【黃庭桄專欄】做自己

很多時候，我們往往會為了取悅別人，或者太過在意別人的目光和睇法，而迷失了自我，反令自己不開心。

在大熱天時，你留了多年的長髮，令頸項經常冒汗，感覺周身唔自在，你想把心一橫，把長髮剪短，變成陽光女孩。然而當你把這個想法告訴男朋友，他卻吐露反對聲音。

「唔好啦！我鍾意你留長頭髮喎！剪短會變成男仔頭，唔靚囉！」

你唯有死死地氣打消念頭，繼續長髮為君留。

當你已白髮滿頭，途經響起音樂盒聲音的雪糕車，你童心未泯，想重溫兒時的歡樂，老伴卻嗤之以鼻：「好心你啦！都幾十歲人，仲細咩？喺條街拎住杯軟雪糕舔吓舔吓，你唔覺得好肉酸咩？」你唯有把雪糕車的音樂拋於身後。

你明明在時裝店千揀萬揀，買了一件新款夏裝，滿心歡喜穿返公司，誰知口痕的同事懶熟咁加以批評：「嘩！青BB咁，你著到似一隻人形青蛙囉！」不是味兒的你，就此把新衫打入冷宮。

又例如買車，你覺得揸Mini Cooper很Cute，但朋友A建議：「你是行政人員，梗係揸房車啦，先至配合你身份嘛！」朋友B卻說：「你啱揸七人車，一家人去街都坐得舒服啲啦！」朋友C加把口：「養架車咁重皮，又油費又停車場費又過海隧道費，仲未計抄牌同超速罰款，坐的士好過啦！」

一百個人有一百個意見，順得哥情失嫂意，到頭來不開心的卻是自己，因為所選都不是自己所愛，彷彿一切都是為別人而活，不是很戇居嗎？請記著，人生是屬於自己的，做自己吧！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。