【星爷讲波 28】耶马横空出世惊艳球坛 奉劝虚心受教免虎头蛇尾

嚟到欧国杯第28日，焦点之一梗系最终冠军花落谁家，到底西班牙会唔会由头带到尾成为四届盟主，抑或荷兰一搔36年之痒再夺冠军，或者终于被英格兰恨到首次捧走欧国杯，答案仲有几日至有分晓，但今届球坛最大发现已经有无可争辩嘅答案——耶马！

证据？星爷随手就揾到一大堆，先系一组纪录。星期二四强大战法国之前，呢位出生在巴塞罗那附近、母亲来自赤道几内亚、父亲来自摩洛哥的16岁小朋友已经系：西班牙联赛最年轻出场/正选/入球球员、欧联最年轻正选球员、西班牙国家队最年轻入球球员、欧国杯最年轻出场球员，比赛之后再加一项，连已故巴西球王比利世界杯/欧国杯最年轻入球球员纪录都俾佢破埋！

够未？未够仲有出名批评尖锐嘅英格兰名宿连尼加话：“一名超级巨星诞生了，他今场的入球可能是今届最美妙的！”舒利亚都加句：“不可思议”，连万人迷都赠番两句，笑说：“有人需要检查一下耶马的身分证，确认他只有16岁，因为我们看到的这一切让我们相信这个男孩已经25岁了，他已经达到了难以想象的成熟程度⋯⋯他踢波就像踢友谊赛一样，没有任何压力⋯⋯就好像他已经踢了 10 年足球。”

其实早在西班牙1比0战胜意大利的比赛，有球评家已大赞耶马表现：“见到美斯的影子！”讲开美斯，正如星爷小组赛时讲过，历史会不断循环，巧合会不停出现，今届E组便重演1994美国世界杯小组赛4队同分嘅历史，要计算得失球差额至决定到出线资格，估唔到呢啲咁巧合嘅事今届一不离二。

话说耶马爸爸近日喺Instagram 贴咗几幅相，相片摄于2007年，地点系巴塞鲁营球场更衣室，照片内容系当年20岁嘅美斯帮一个婴儿冲凉，个BB竟然系耶马。

负责拍摄嘅摄影师回忆话当年联合国儿童基金和当地报章安排巴塞球员同一啲小孩拍摄慈善月历，咁啱喺耶马居住地区抽奖，又咁啱耶马家人参加抽奖并中奖，更更啱系结果配对同美斯做拍摄组合。网上唔少人打蛇随棍上借题发挥，话美斯当时施魔法传授咗内功畀耶马，所以耶马球技至咁劲，仲由此敲定佢系球王接班人咁话！

耶马作为年轻球员，能够被人肯定当然开心，但星爷奉劝佢一句，千祈唔好畀一时嘅成功冲昏头脑，见过唔少自小成名，被喻为乜乜接班人嘅明日之星，被捧到上天后就不可一世，以为球队无咗佢唔得，缺席练习唔听指挥时有听闻，又有啲唔识自爱，烂饮烂赌烂嫖乜都齐，结果表现下滑被人唾弃，由前途无量变前途尽毁。前车可鉴，耶马务必虚心学习，毕竟踢波并唔系只讲球技，想成为球王，仲有好多嘢要学！

T100

【2024年欧国杯期间，加拿大《星岛网》每日都会有驻场“球评人星爷”为大家开坛讲波，仲揾埋AI帮手预测赛果，人机强强联手，肯定“近”到无伦！】