【星爷讲波 27】四强火并：英格兰胜在人脚经验 荷兰攻强守弱有破绽

周三( 10日)：英格兰 Vs 荷兰 (加东时间下午3:00)

欧国杯明日上演另外一场四强大战，由上届亚军英格兰火并橙衣军团荷兰，胜方可以在星期日跟西班牙或法国争夺欧洲王者宝座。

两军晋级过程都带幸运成分，而运气除咗反映喺场内，亦反映在走线。同处下线嘅英荷，避开咗另一条线嘅劲旅，包括世界排名第二嘅法国、攻力最强嘅东道主德国、最有冠军相嘅西班牙，另外仲有比利时、葡萄牙两支欧洲一线球队，间接提高杀入四强或决赛嘅机会。

英格兰今届由一开始至四强，过程一直充满争议声。虽然小组赛顺利以首名资格出线，但1胜2和嘅成绩，以及临场表现明显唔及预期，特别系最后一场同斯洛文尼亚互交白卷，引发国内球评家、名宿和球迷嘅疯狂指摘。即使到淘汰赛阶段，教练修夫基多番变阵都未见明显改善，连续两场波都系先失守，如果唔系比宁咸完场前嘅世界波，以及沙卡功架十足嘅妙射，英军早就执包袱回国。

荷兰亦唔好得几多，小组赛1胜1和1负得4分，仅以最佳第三名嘅资格晋级。到16强先至叫做有啲起色，3-0大胜罗马尼亚，但八强面对土耳其亦都系先失一球，最后靠个乌龙波至反胜2-1晋级，得以20年来首次杀入欧国杯四强。

讲番两队今场形势，如果计表现，星爷觉得5场入9球嘅荷兰稍为占优，估计教练朗奴高文继续采用效果不俗且灵活嘅4-2-3-1阵式，进攻方面，施蒙斯策动攻势及掩护前方嘅迪比和左路嘅加普，而尼敦阿基应该会续任左后卫，而中场华亚文估计取代雷恩达斯或谢迪舒贺顿嘅位置。

至于英格兰，后防喺对瑞士一仗用嘅三中坚阵式唔见太大效果，但伤愈嘅劳基梳尔后备上阵，令左路攻守变得平衡，应会复任正选，另即使干沙上场表现出色，由于马克古希停赛一场后可以复出，佢都应该系修夫基首选。前线队长哈利卡尼状态虽然未达最高水平，但有稳定军心作用，不宜轻易放弃。星爷觉得英队要过关，杀着肯定系沙卡，希望修夫基唔好再浪费佢嘅才华，乱点鸳鸯，继续安排沙卡踢佢最耍家嘅右翼位。

星爷预测英格兰同荷兰百二分钟难分高下，互射十二码后，幸运之神会选择荷兰，英格兰缘尽四强。

AI预测：

英格兰 Vs 荷兰 (下午3:00)

预测赛果：英格兰胜

半场比分：英格兰1-1 荷兰

全场比分：英格兰2-1 荷兰

总入球数：3球

T100

【2024年欧国杯期间，加拿大《星岛网》每日都会有驻场“球评人星爷”为大家开坛讲波，仲揾埋AI帮手预测赛果，人机强强联手，肯定“近”到无伦！】