【曾智華專欄】打到開花，忽略其他

若果用「抵唔抵睇」來衡量《海關戰線》，真係抵到嘔！

三位影帝張學友、謝霆鋒、吳鎮宇及兩位影后林嘉欣、劉雅瑟擔綱演出，投資也肯定驚人，必定億億聲。製作方面，更得到香港海關全面配合及支持，幾乎要乜有乜。

首映禮陣容空前鼎盛，司長、局長紛紛現身撐場，尤其與海關工作有直接聯繫的保安局局長鄧炳強及海關關長何珮珊高調撐場，畀人感覺此乃「官方片」。

全片重點宣傳謝霆鋒，佢身兼動作指導及主角，全程搏命瞓身演出，簡直賣命。

事實此片進入下半部，開始打到開花，而場場領軍的皆謝霆鋒，恍似「一人孭晒」，動作佢設計，而打更場場親身上陣。

效果如何？我只可以講是合格有餘，但比起今天香港的頂級動作指導，包括錢嘉樂、董瑋、程小東、袁和平、羅禮賢、甄子丹，以及最當時得令的《九龍城寨之圍城》動作指導谷垣健治，在功力上及設計意念上仍差半班。

不過，肯定謝霆鋒有沖天心火在這方面發展，而時間又在佢一邊，進步可期。

說來《海關戰線》也實在太著重謝霆鋒，也太多場面放在打打打，結果去到中段後，我對此片的結論，已是：打到開花，忽視其他，有點輕重失衡。

導演方面，早前上畫的《談判專家》，小弟認為是邱禮濤近年罕有佳作，絕對有機會問鼎下屆金像獎。弊在剛剛珠玉在前，立即接上《海關戰線》，一比，又係低咗半班。駕馭方面，不少場面並沒《談判專家》般從容而得心應手。

很多人入場是想看看消失於銀幕多年的歌神學友，演技可有生疏？答案——冇！仍具影帝級功架，只是角色設計未能令佢全面融入。