買年金百年歸老 保證複式回報9.2厘｜曾智華

本欄於6月24日刊出《每月送492元直至百年歸老》一文，可能條題起得夠吸引，於刊出後筆者收到大量迴響，電話響個不停，單單是老友已有幾十人查詢，社交平台上的更如恆河沙數。

但並非個個皆是提問，比較特別一位乃著名理財專家兼精算師大B，竟替我「算財命」：「碌Sir，你上次話自己分分鐘100歲，故如今70歲買加碼津貼年金30萬好着數。其實你冇計算清楚，等我替你做個Model Plan啦，呢個Model可以用在任何長者身上，只要佢自己將數字調校即可！」

用70歲買30萬特別年金計算

大B以我在70歲時買30萬特別年金計算，分4個壽命長度推斷：第一種情況是拎到85歲，共拎了180期（15年），每期2,460元，保證複式回報率為5.5厘；第二種情況是拎到90歲，拎了240期（20年），每期2,460元，保證複式回報率7.9厘；第三種情況是拎到95歲，共拎了300期（25年），每期2,460元，保證複式回報率8.7厘；第四情況是拎到100歲，共拎了360期（30年），每期2,460元，保證複式回報率9.2厘。而每月年金支付的實際複息率（簡稱IRR），基於年金屬保證產品，所以上述回報率也是保證的。

以上是現時香港年金公司推出買30萬特別津貼率的計法，優惠計劃只到年底，其後一切「打回原形」。當然有樂觀者覺得，今年出特惠津貼咁受歡迎，可能下年會再推特特特惠津貼呢！

講完一大輪你明唔明？唔明？自己打電話去香港年金公司，搵個專業顧問解釋就可以了。

最大投資自住樓 閒錢買銀債公用股

小弟的終生理財組合，當然不會大部分放在年金，最大的是自住樓宇，首先供滿，之後一路投資在美化方面，令自己住得更舒服，令家人關係更和諧，身心更健康。連帶影響是免疫能力也會提高，病魔難擾，咁先可能會有100歲㗎！

其他閒錢，第一全買「冇得輸」（呢個世界獨有）的銀髮債券，然後是「政府錫晒，唔畀佢有事」的公用股，如此就可以安枕行完人生路喇！

資深傳媒人 曾智華