【星爷讲波 25】瑞士差半步突破樽颈 输波赢尊严信有明天

星爷昨日表扬完球员(德国中流砥柱却奥斯)，今日想赞下球队，不过唔系爱队奥地利，亦都唔系有冠军相嘅西班牙，更加唔系再入四强嘅英格兰，而系只要挨多十几分钟，就可以突破世界杯和欧国杯成绩，历史性杀入大赛四强嘅瑞士。

星爷真心觉得瑞士是今届欧国杯上少数几支一直保持出色表现嘅球队之一，佢哋对英格兰嘅八强赛喺最后阶段先拔头筹，如果唔系勇不可当嘅沙卡射入个靓波，瑞士已经喺法定时间赢波，唔使互射十二码分高下。

瑞士艾简治射失十二码，直接让球队失去晋级四强嘅机会，但星爷相信无人会怪呢位英超冠军曼城中坚，佢嘅领导才能和出众球技，系瑞士连续第二次进入欧国杯八强赛嘅最主要功臣之一。

翻查历史，瑞士喺大赛表现一直稳定而出色，最近5届世界杯都可以晋级决赛周系最佳证明，历来也名将辈出，近嘅除咗艾简治和老马沙基利，远嘅有前锋弗尔（Alexander Frei）、卓佩沙（Stéphane Chapuisat），当然唔少得踢而优则教嘅现任统帅梅勒耶坚(Murat Yakin)和他弟弟哈根耶坚(Hakan Yakin)，全部都为瑞士立下唔少汗马功劳。

从小组赛至八强，瑞士一场比一场踢得好，经典演出包括小组赛搞乱德国嘅全胜派对，以及16强2-0技术击倒上届冠军意大利。几位球员居功至伟，其中队长格列沙加证明咗自己价值，两次获得比赛最佳球员，系瑞士进攻核心；前锋安保路从长期伤病中复出，射入两个关键波；仲有前锋新秀尼当耶嘅速度同活力都令人有惊喜。

瑞士5场射入8球，攻力不下于东道主德国和夺标大热西班牙，而且是来自7名不同球员，证明佢系一支紧密团结嘅球队。

最后不得不赞一下教练梅勒耶坚(上图右)，舆论对佢带领瑞士喺欧国杯外围赛取得差劲战绩之后仍被留任感到不满，但佢现在终于可以一吐乌气，以灵活多变嘅战术、适时换人，以及让球员有信心与大牌球队对抗嘅领导才能堵住批评者嘴巴，《新苏黎世报》的标题都系：“瑞士队在欧国杯上未能达成目标——但这是一种喜悦”。

带住尊严出局，点都好过带住耻辱出局，星爷相信佢地始终有登顶一日，就好似昔日总系喺大赛决赛周滑铁卢嘅西班牙一样，以佢哋嘅实力，依家只系等一个集齐天时地利人和嘅机会发光发热，瑞士队加油！

T100

【2024年欧国杯期间，加拿大《星岛网》每日都会有驻场“球评人星爷”为大家开坛讲波，仲揾埋AI帮手预测赛果，人机强强联手，肯定“近”到无伦！】