【星爺講波 25】瑞士差半步突破樽頸 輸波贏尊嚴信有明天

星爺昨日表揚完球員(德國中流砥柱卻奧斯)，今日想讚下球隊，不過唔係愛隊奧地利，亦都唔係有冠軍相嘅西班牙，更加唔係再入四強嘅英格蘭，而係只要捱多十幾分鐘，就可以突破世界盃和歐國盃成績，歷史性殺入大賽四強嘅瑞士。

星爺真心覺得瑞士是今屆歐國盃上少數幾支一直保持出色表現嘅球隊之一，佢哋對英格蘭嘅八強賽喺最後階段先拔頭籌，如果唔係勇不可當嘅沙卡射入個靚波，瑞士已經喺法定時間贏波，唔使互射十二碼分高下。

瑞士艾簡治射失十二碼，直接讓球隊失去晉級四強嘅機會，但星爺相信無人會怪呢位英超冠軍曼城中堅，佢嘅領導才能和出眾球技，係瑞士連續第二次進入歐國盃八強賽嘅最主要功臣之一。

翻查歷史，瑞士喺大賽表現一直穩定而出色，最近5屆世界盃都可以晉級決賽周係最佳證明，歷來也名將輩出，近嘅除咗艾簡治和老馬沙基利，遠嘅有前鋒弗爾（Alexander Frei）、卓佩沙（Stéphane Chapuisat），當然唔少得踢而優則教嘅現任統帥梅勒耶堅(Murat Yakin)和他弟弟哈根耶堅(Hakan Yakin)，全部都為瑞士立下唔少汗馬功勞。

從小組賽至八強，瑞士一場比一場踢得好，經典演出包括小組賽搞亂德國嘅全勝派對，以及16強2-0技術擊倒上屆冠軍意大利。幾位球員居功至偉，其中隊長格列沙加證明咗自己價值，兩次獲得比賽最佳球員，係瑞士進攻核心；前鋒安保路從長期傷病中復出，射入兩個關鍵波；仲有前鋒新秀尼當耶嘅速度同活力都令人有驚喜。

瑞士5場射入8球，攻力不下於東道主德國和奪標大熱西班牙，而且是來自7名不同球員，證明佢係一支緊密團結嘅球隊。

最後不得不讚一下教練梅勒耶堅(上圖右)，輿論對佢帶領瑞士喺歐國盃外圍賽取得差勁戰績之後仍被留任感到不滿，但佢現在終於可以一吐烏氣，以靈活多變嘅戰術、適時換人，以及讓球員有信心與大牌球隊對抗嘅領導才能堵住批評者嘴巴，《新蘇黎世報》的標題都係：「瑞士隊在歐國盃上未能達成目標——但這是一種喜悅」。

帶住尊嚴出局，點都好過帶住耻辱出局，星爺相信佢地始終有登頂一日，就好似昔日總係喺大賽決賽周滑鐵盧嘅西班牙一樣，以佢哋嘅實力，依家只係等一個集齊天時地利人和嘅機會發光發熱，瑞士隊加油！

T100

【2024年歐國盃期間，加拿大《星島網》每日都會有駐場「球評人星爺」為大家開壇講波，仲搵埋AI幫手預測賽果，人機強強聯手，肯定「近」到無倫！】