【曾智華專欄】貼高官升職三重彩

先天興趣，小弟最喜歡「貼嘢」，乜都貼餐飽。故此，近期大快樂，因可以估歐洲國家盃賽果，又可繼續一周兩次貼賽馬結果。

另有一樣，凡政商官界人晚飯，皆在貼，不過，極少公開講，正是貼官場升班馬及可能「被退役」的馬。

本屆特區班子剛剛完成兩年任期，特首頻頻接受訪問，其中一條「辣」的問題，為問會否換局長？（問者當然心中有人要撤換啦！）有此一問，因歷屆特區班子，由特首到政務司司長再到局長，皆有人「中途墮馬」，此非甚麼不可能的事。

超哥初步答案，為「唔使換」，相信本來心裏有數可能被換者，鬆一口氣。

好嘞，等我又貼吓升官圖先。

跑咗兩年，以馬論馬，小弟認為有三「隻」，極具升班潛質，一有空位就會上！大家睇睇準唔準。

一、海關關長何珮珊。擺到明重點栽培目標，現年五十六歲，即將退休，但早已被鋪出一條康莊大道，代表中國香港出任今屆世界海關組織亞太區副主席，即已去到國際級層次，參與國家戰略大重任，唔講得笑，升級可期。

二、財政司副司長黃偉綸。六十一歲，當打期，AO出身，從事多個重要崗位，為人圓通精明，中英俱佳，代表香港出席國際場合，形象及談吐皆具「一國兩制」味道，應再上層樓。

三、房屋署署長羅淑佩。五十六歲，勁打得，做事上心投入，在上任推三隧分流，如今全面打擊濫用公屋，皆需要沖天鬥志才能成事。佢最著名「迎難而上」，官場中具有這種特質高官為數不多，肯定屬「升班馬」。

講講今晚快活谷賽事，當伍鵬志、呂健威兩廐鬥到七彩及殘殘哋時，我反而留意「黑夜之神」方嘉柏兩隻：「銀進」及「春風萬里」。