【曾智華專欄】去到邊寫到邊

上周小弟在專欄透露，到貴州旅行，因不少景點洗手間沒有坐廁，故令團中揸枴杖老人家極度不便，唯有放棄唔上山，但一個人點搞？冇問題，反正我並不熱衷身水身汗四圍「欣賞美景」，好，留低在出發處作陪可也。

每次皆要呆坐最少個多小時，白捱浪費光陰？當然不會，易過借火，立時抽出稿紙及筆，好似車衣女工咁「渣渣聲」寫稿，總之去到邊寫到邊。

經常有人問：「喂，碌Sir，乜你寫極都唔乾塘㗎？邊來咁多靈感日日寫？」

「冇得解釋，天生嘅！」

以前幾十年，憑多口，朝朝主持電台早晨節目也永不乾塘，如今轉跑道也如是，寫呀寫，源源不絕。

其實從事每個行業者皆有天分，學都學唔嚟。年輕人能早知自己天分及興趣，盡力爭取入行，必定出人頭地。

昔日小弟管電台，年年考新DJ，試音及筆試合格後，就接受我面試。

面試純考天分。簡單，你把聲靚到天跌落嚟，又或寫嘢寫到識飛，但交個咪畀你做廣播，最重要乜？平時說話當然要求有內容、有趣味性，以吸引聽眾（這個可早準備），另更重要為執生爆肚！因直播途中，乜都可能發生，例如任何機件Down（壞）咗、訪問中對手暈咗、拍檔肚痛閃咗⋯⋯總之是突然要你齋講十分八分鐘，以等一切回復正常。

呢種急才急智絕對考天分。我也曾試過做電視直播時，嘉賓（李澤楷）未出現，要頂十五分鐘，結果，如果唔識見到乜都講一大餐，即死。

所以考DJ其中一項測試，畀對筷子或畀波佢：「請用自己想像力講五分鐘，唔准斷，唔准停。」

過到關者即具基本天分，若再加聲靚、學歷好及專業態度，咁康莊大道就在前面。