【曾智華專欄】女長者遊貴州大困擾

港人北上消費，最多的當然湧往深圳，事實那裏已是個百分百先進大城市，有齊衛生設備，種種設施可能比香港更好。

但中國之大，仍有不少地方十分落後，就算旅遊區，要搞建設，要搞衛生，要扭轉農村文化，仍需一段長時間。

例如貴州，山明水秀，有世界級大瀑布及超級科技設備「天眼」，故引得極多國內國外遊客湧到。但其他配套呢？交通？酒店？衛生？飲食⋯⋯

基於不少景點在山區，咁就弊，除地勢上上落落，加上當地幾乎天天下雨，路面極濕滑外，大部分餐館賓館皆仍非常鄉鎮化，即粗枝大葉，事事不多講究，包括衛生。

小弟同團有幾位女長者，其中之一行動不便，雙腳冇力，只能勉強揸枴杖慢慢行。

結果第一日已經皺晒眉頭，唔知點搞。

乜事？正是郊野餐館幾乎一律踎廁，我哋用午餐的一間，當然如是。

長者入完洗手間出來，愁容滿面，成個慘慘豬樣，無他，因從來未用過踎廁，兼且雙腳完全冇力踎低，點搞？連經驗豐富的導遊也企咗喺度，硬晒軚。

一眾七嘴八舌，問有冇成人紙尿片賣（附近山區啊）？有冇成人「便盤」賣？附近有冇公共「殘廁」？問完N個無法解答問題，最終極決定，導遊到附近逐間餐館睇睇可有座廁，然後扶長者去。

結果⋯⋯在百多米多的另一間餐館搵到嘞，於是扶住長者一步一拐，極辛苦才去到。

之後，即時轉所有沿途安排，要肯定有座廁才去。冇又點？試過幾次山上景點冇座廁，只得山腳出發點有，咁，好，就由我陪長者等啦，反正小弟可以去到邊寫到邊，兼且對睇景點興趣不大，因覺睇Video角度更正！