【曾智華專欄】Tunnel Vision小井蛙

五十年前，千辛萬苦（因經濟能力極薄弱）籌錢走去美國留學，因傾慕當地的一切自由風氣，實在非常嚮往。更有幸能入讀傳理系，此學系強調推動至高無尚的言論自由，校園之內噏乜都得，過癮。

點解諗起這段日子？因發覺近幾年小弟凡表示自己每日睇七份報紙時，總有人以輕藐態度留言：「乜今時今日仲有人睇報紙嘅咩（但佢睇的，正是我的專欄）？」

恍如唔睇報紙就代表潮、代表型！係真唔係真？不過，這令我重溫半世紀前，在俄勒岡州大學內，被教授當眾噴的一次刻骨銘心教訓。

上課第一日，佢抽起我問：「Luke，你在香港，睇邊份報紙的？」當時我懶醒，只講三份知識分子報及一份西報，以為咁就好有卡士。

點知佢兜口兜面質過嚟：「點解你唔睇北京立場及台灣立場報紙？你咁偏睇，有乜資格讀傳理系？英語有云：Tunnel Vision（視野狹隘），以及你哋中國人有句老話：A Frog In The Well（井底蛙），正正代表你的睇事角度及心態。」

省完一輪之後，佢要求每個學生，每日不准只睇某一個台（例如FOX、CNN、BBC或CBC），以免自己陷入某一方面的喉舌思維。

美國的好處，是大家可以公開反政府，當年校園高潮，當然是反戰——反越戰及韓戰。

經過幾年美國大學教育，在港也從事幾十年傳媒，工作與興趣融合，小弟每日必睇勻各種立場報紙、各個電視台（本地及國際，尤其西方以外的必須參考，包括中央台、Russia Today及卡塔爾電視台）。當然，全部背後都有利益團體操控，宣揚權力來源訊息及意念。

睇勻後，再用獨立思考及客觀分析作判斷，如此才不會變隻Tunnel Vision的小井蛙。