【曾智華專欄】最後直路大血拼

英國有兩項「運動」，真真令參與者個個氣咳，做的氣咳，睇的也氣咳。

我講乜？正是英超聖誕快車與皇家雅士谷大賽。當然，兩樣都不是無緣無故爆出來，而是有歷史因由。不過，基於兩項運動已成全球盛事，不少球迷、馬迷一定會跟。如此，日日踢、日日跑（五日），怎不跟到嘔泡？

香港尤甚，今日跑完「女皇伊利沙伯二世禧年誌慶錦標賽馬日」，明天又到香港安排十一場，一於唞暑前餵到馬迷滯晒為止。

集中講香港，練馬師冠軍之爭非常精彩，我早前買呂健威如飛殺上過頭，果然如此，究竟鬥落去會點呢？如今六十三場對六十二場，兩廄必定在餘下賽日出盡奶力，所以，次次都晒冷式報名。

明天呂廄九匹正選，伍廄更誇張，十二匹，擺明同你死過！

第八場千四米三級賽呂廄「包裝必勝」應冇乜機會，而伍廄兩駒則要面對大老虎「加州星球」。「神虎龍駒」今年初千四米三級賽W，贏兩馬位，極具說服力。事實此駒今季大熟大勇，交出四W一Q。不過，已出賽十一次，太多了。

另一匹「綠族無限」，現評一百分，今季出咗八次，交出三W一Q三P，一級賽曾跑入第三，英語形容是Up and Coming，未到頂分也。此場擂台躉「加州星球」要讓佢二十六磅，邊隻衝線先，真真跑過至知。我投「綠族無限」一票，因鬥志肯定沖天飛也！

另一場三級賽也勢必精彩，因全部馬房皆放出鎮倉之寶。我又點投注？一於捧呂廄「禪勝輝煌」，佢將要面對成棚惡馬，尤其告仔出四匹，殺聲震天，不過冇一隻有條件成全熱門，呢場邊隻勝出都應有三倍以上。

我捧呂健威做冠軍，一於買「禪勝輝煌」！