【星爷讲波 06】克罗地亚大叔经验搭够 阿尔巴尼亚偷鸡“靠抢”

重点推介：B组 克罗地亚Vs阿尔巴尼亚：加东时间周三(19日) 上午9:00

欧国杯决赛周24支球队全部亮过相，明日(周三)开始第二轮嘅厮杀，3场大战中，从各队首场表现及出线形势嚟睇，星爷觉得B组克罗地亚对阿尔巴尼亚嘅比赛应该最有睇头。两支败军为咗唔想提早执包袱返归，呢场几乎系非胜不可！

克罗地亚第一场对阵西班牙嘅比赛净吞3蛋，有人话佢地表现失准，但星爷觉得克军系输体能，尤其比赛后段明显后劲不继。教练达历喺赛后亦提到，球队必须提升能量，例如莫迪历（下图左）同高华锡两位中场大叔到下半场中段就双双被换走，显示出佢哋体力出现问题。不过，克罗地亚烂船都有三斤钉，有莫迪历领军，加上防守核心加华度尔，球队喺技术同战术上都具备优势。

而阿尔巴尼亚方面，喺对阵意大利嘅比赛中，虽然最终输1-2，但佢哋开场仅23秒就入咗球，创下了欧国杯最快入球纪录，全场亦展现出咗顽强拼搏嘅精神。阿队阵中有唔少好似中场格苏拿踢法咁硬朗嘅球员，下下都埋身抢截，试图令对手犯错然后偷鸡。

从双方大军名单睇，克罗地亚拥有较多经验丰富嘅球员，特别系前锋线上，有卡拉马历、比列锡呢两把尖刀，而阿尔巴尼亚则比较依赖年轻球员如波查（下图）。如果计以往对赛成绩方面，克罗地亚(3胜1和1负）处于绝对优势，但“波系圆嘅”，足球场上乜嘢都有可能发生。

克罗地亚今场应该会继续用控球在脚战术为主，同时依靠莫迪历嘅球赛阅读能力，创造打门机会。防守上，加华度尔同舒坦路会系关键，佢哋需要防范阿尔巴尼亚嘅快速反击。

星爷预计阿尔巴尼亚会以防守反击为主，通过中场嘅拼抢以快打慢，试图寻找克罗地亚后防嘅漏洞，而波查将会系佢哋攻击嘅主要武器，如果佢能够有效地牵制住克罗地亚后防，将会大大提升阿尔巴尼亚嘅胜算。

总结嚟讲，克罗地亚嘅实力同经验略胜一筹，但都唔可以睇小阿队嘅拼搏精神。预计今场比赛会系一场快上快落嘅激烈比赛，埋身肉搏镜头应该唔少，星爷认为和波机会唔细。

AI预测：

B组 克罗地亚 Vs 阿尔巴尼亚 (上午9:00)

预测赛果：克罗地亚胜

半场比分：克罗地亚 1-0 阿尔巴尼亚

全场比分：克罗地亚 2-1 阿尔巴尼亚

总入球数：3球

A组 德国 Vs 匈牙利 (中午12:00)

预测赛果：德国胜

半场比分：德国 2-0 匈牙利

全场比分：德国 3-1 匈牙利

总入球数：4球

A组 苏格兰 Vs 瑞士 (下午3:00)

预测赛果：瑞士胜

半场比分：苏格兰 1-1 瑞士

全场比分：苏格兰 1-2 瑞士

总入球数：3球

T100

【2024年欧国杯期间，加拿大《星岛网》每日都会有驻场“球评人星爷”为大家开坛讲波，仲揾埋AI帮手预测赛果，人机强强联手，肯定“近”到无伦！】