【曾智華專欄】歡迎非洲投資移民

特區政府非常着緊引入投資者，已屬眾所周知，其心急已到龍門可以「彈性搬移」。冇法，這就是現實。

上周末大群「口水友」（全部見過世面）聚餐，唔講香港大學「血拼」喇，改而嘻嘻哈哈，講乜？講投資移民！

上周政府回覆立法會，交代3月推出的「新資本投資者入境計劃」反應，原來已「成功地」收到二百四十五份海外申請。當大家認為⋯⋯唔，都幾好吖之際，冷不提防一份申請者背景資料曝光（公開文件也），個個睇完笑到碌地。

笑乜？正是笑申請者的背景，相當過癮也。原來最大量，佔足一百九十二位，竟來自兩個非洲窮國畿內亞比紹及瓦努阿圖！

大家想認識兩個國家位置、人口及GDP，易過借火，即上網查查，已一清二楚。

不少香港人過去幾十年皆曾試過「飢不擇移」，總之，搵通全世界，睇吓邊個國家可以容容易易就入到籍，更重要唔使點住就會批出護照。

結果，發覺部分非洲國家以「賣護照」作經濟來源，一切非常彈性，龍門可以任搬，總之你肯畀大概十萬港元就掂，讓你正正式式變為「非洲人」，之後該國不會理你用個身份做乜，反正當地「賣護照」乃合法的。

申請來港投資定居的，是哪類的「非洲人」，大家心照不宣，實在太過癮了。

不過，也要祝這批移民「好運」。因上一批2015年的投資移民，當年投資港股港債成千萬元，遇上過去幾年香港金融大縮水，肯定個個蝕到攤攤腰嘞。

接收呢類投資移民，通常認錢唔認人，你肯投資就得，而一定有基金大鱷願意提供服務。

講來講去，又再一次證實，在某啲人眼中，香港特區護照仍是非常有價，故要千方百計取得㗎。