【曾智華專欄】你結業，佢擴張

傳媒又好，友儕又好，壞消息永遠傳得快如閃電；好消息呢？慢慢先，此乃「市場天性」。

例如飲食業，若有一個稍老字號玩完，我的手機必第一時間彈出N個「奔走相告」信息。新開張的又如何？真係搞到成身汗都未必有人提。

其實行行皆一雞死一雞鳴，香港的飲食業絕對如是。

有啲「扮執」，其實換個招牌，換個形象，執一執裝修又開張。正如我早前指出，土瓜灣靠背壟道翠河餐廳「執笠」，嘩，十日後同一集團的荷里活冰室立即「開張」。

效果點？非常好。首先，清走咗啲粗口侍應，換來較正常有禮的；制服換過。這一換就有化學效果，連班粗口客都有所收斂，茶水部那位不停「嘶叫」的阿姐亦情緒穩定下來。

跟住斯文客不斷湧現。以前畀粗口侍應及中佬搞走的父母，帶同學生子女客人，也紛紛回歸，目測所見，早午晚生意大大改善。

再講另一間「復活」的，正是早年畀「米芝蓮」封號，搞到一身蟻（業主加租、大廚被挖、樓面扭計⋯⋯）的「阿鴻小館」。終於變身幾年，阿鴻捱到重病，幸而鬥志驚人，一次又一次爬起來再搏過。

最近又通知：「碌Sir，『阿鴻小吃』六月重開喇，今次租咗謝斐道535號地庫，請繼續支持吓我呀！」

支持阿鴻，並非單單為美食，而是向一份打不死精神致敬，希望助佢以事業趕走病魔。

仲有一間不是復活，而是擴充。個個話飲食業冇得做，點解佢又可以由容納一百位舖，搬去二、三百位的大單位？正是以叉燒及懷舊廣東菜起家，一年內攞米芝蓮推介的「船記」。

經理Shirley來電報喜：「8月新店開張喇，快快來呀（可能冇位喎），放心，包喺我身上，幾多位都有！」