【曾智華專欄】香港乃「國際提款機」

今屆遮打盃，公論，冇得跑！簡直好英超水準對修頓小型球。

馬王「桀驁之戀」擺明嚟香港撳錢，輕輕在提款機一按，就提走七百幾萬元（當然幕後下注而贏的更是驚人）。入到直路最後二百米，已恍似在無人之境，隨時可以收工。

咁搞法，下年點呢？香港根本冇國際一級長途馬，若繼續容許外國馬參加而冇得「鍊」，等於年年向「外國勢力」送錢，唔係幾妥。

呢場小弟最冇癮為見到「將王」毫無招架之力，丁點兩屆冠軍風範都冇，應該玩完嘞。更弊，今次跑亞軍的「錶之五知」也已六歲，難再有進步空間。至於季軍「當年情」，水準更差少少，再難勉強。

意即下年「遮打盃」，「外國勢力」絕對有可能掃光所有獎金。咁點搞？

作為「提款機」，其實香港好易「撳錢」，尤其金融世界，只要國際大鱷有耐性又願攜手，真係好鬼易。大家可記得N年前一役？其實條「橋」可以再用又再用，只不過冇當年咁和味啫。

正是吼淡市先吸期指，再狂掃權重股，搞到個市大升，配合華爾街公關高手組織合唱團大戶合奏，引散戶入追權重股，升到咁上下，閃電將期指平倉，先賺一筆，再大手沽股票，又賺另一筆，你話幾易搞？近期恒指由萬四點剷上近二萬點，有冇咁味道？少少啦。但我覺得班大鱷未玩完㗎！

明日沙田兩場三級賽，第九場跑千二米好睇唔好買，有兩隻如日方中明星馬在陣，皆因上次Easy Win已被瘋狂加分。第一隻是「嘉應高昇」，希斯鎮倉之寶，上次「行返嚟」贏，加十二分，但未跑過級制賽。另一為「賢者無敵」，上次勝出一級賽，攞命，加十五分。

明天睇吓邊隻輸又點輸，已好高娛樂性！