【黃庭桄專欄】越看越惡心

由於今年是踏入九運的第一年，奇人怪行特別多，誰會想到，兩個名不經傳的普通夫妻，會成為全城熱話。

一個七十六歲的何伯，為了四百幾萬元存款，與五個子女反目。一個四十三歲的肥師奶何太，鄉音無改，既在抖音教女人如何釣金龜，又開直播暢談兩夫妻房事，更惡心地在鏡頭前接吻，享受一夜成名的樂趣。

從未如此紅過，怎不飄飄然？兩人越來越失控，公開鬧爆何伯的五個仔女如何忤逆，又披露大仔的姓名和職業，實行一拍兩散。

幾十歲人，完全不知道甚麼叫肉酸？接受電視台訪問時，何伯全程用右手攬實何太，左手就捉住何太的玉臂係咁捽，是怕她會飛出自己的手指罅，最後落得人財兩空嗎？

講起上一段離異的婚姻，何太瞇起雙眼，狀甚神傷，奈何半滴眼淚也擠不出，可能需要去藝訓班惡補一下。

何伯除了繼續掐實何太的身軀，又出言安慰：「有情梗係飲水飽啦！（咩水啊？）梗係靚嘅礦泉水，唔通飲水喉水咩？」這個冷笑話，只有何太一個人陪笑。

看著他們的連續劇不斷上演，越來越感到，何太是一個相當有可疑兼「葵介」的人，噏得就噏，胡亂吹牛，面皮有成萬呎厚，面珠有一個膠盆咁闊，賣相不討好，額頭彷彿鑿住一個「貪」字。

可悲是那個何伯，還自豪地說：「如果我哋唔係真愛，就唔會咁樣錫嘴啦！」吻下來，豁出去，癡男怨女最登對！

望著何伯的裝束，每次出街都會戴一頂鴨舌帽，遮掩斑白的頭髮，再聽埋他聲討子女的語氣，怎麼咁似一個人？不就像爭產KOL梅啟明嗎？唉！相由心生，可惜洗濕了頭，回不到岸。