【曾智華專欄】殺無赦，冇得博

新聞鋪天蓋地，報道一名印尼籍旅客從香港飛台灣，將飛機餐中的燒臘雙拼打包，儍吓儍吓帶入境，即被檢疫犬找到，斷正！

台灣乃一個島，非常非常緊張病菌疫症傳播，一如澳洲及新西蘭，對意圖帶禽畜肉類及植物蔬果入境者，一概「殺無赦」，不單止即時將一切銷毁，更重手判罰。

現今台灣第一次開罰，已大大錘扑下，罰二十萬台幣，有偷運記錄者若再帶，第二次一百萬台幣！冇錢畀？即時原機遣返，以後想入境，必須先繳清罰款。

作為香港人聽見呢項超級罰款，當然會問：「使唔使咁誇張？」如果你知道若台灣把關不嚴，一旦任何病菌進入，會產生幾大摧毁性，就知點解，易地而處，你是台灣政府，同樣會「殺無赦」。

寫此稿時，小弟剛在台灣，昨天入境，也覺氣氛緊張，過關前，有多個大牌貼上被緝獲的不同種類違禁品，不單止肉類及蔬果植物，更有火鍋湯底、糕點、泡饃、溫泉蛋、人參⋯⋯總之，入境前最安全，將一切食物、植物丟棄，否則分分鐘麻煩纏身、重金贖身！

其實台灣海關官員也做足警告，除展示所有禁品外，更在旅客過綠區前，有三位制服人員輪流提醒。老友，若你咁都「闖關」，真係抵你死啦。　　

食物外，老友肥A早前入境澳洲，也有奇遇。佢乜都遵守晒，仍被截停。話說肥A乃奉公守法一族，不時穿梭全球，絕對清楚要入境問禁。

去年到澳洲，悉尼機場入境，為安全計，自己打開行李再查一次，連咖啡茶包也全都丟棄，肯定冇違禁品才過關。豈料仍被叫停，帶入搜身房。乜事？犀利，原來佢過關時，被儀器查到鞋底有泥土，必須即場清洗。