【曾智華專欄】有錢都唔要

香港賽馬獎金非常豐富外，每場頭六隻皆有獎金，總之出到閘，就算爬返來第六過終點，都有獎金，真係筍，尤其是馬少場合，執硬。

不過，奇！不少練馬師及馬主的決定，少少違反常理，就是——有錢都唔執！

舉例，今晚第一場泥地二班賽跑1650米，竟然冷清到只得五隻報名，意即隻隻有獎金，但點解冇第六隻㗎呢？

喂，出嚟遊馬河或當晨操都好吖，起碼執返一個月養馬費，又唔會跑傷馬，點解唔玩？

呢場我一定投注，因為一季冇幾多場係可以Fit In自創的長期贏馬方程式，即係：高班、馬少、讓磅，三大因素加埋，就等於「爆」！好少不是如此「開」的，大家可翻查記錄！

呢場真係刨都嘥氣，因五隻出賽馬，隻隻有全天候地勝出或入Q記錄。

單論1650米，有三匹W過：「黃腳鱲」、「魅影獵飛」及「保羅承傳」。

而「電訊巴打」則在兩個多月前，於布文跨下幾乎偷雞勝出，只輸短頭，如今隔紗兩場，隨時可再揭竿而起。

唯一冇1650米全天候賽績的是「魅力寶駒」，但今季突然跑兩場泥地1200米，失驚無神地百分百W出，究竟此駒拉長到1650米，能否應付呢？這個謎今晚揭盅。

我的投注法，一定有派彩，正是五隻穿十蚊Q及五隻複式二重彩五蚊注。

兩條飛共二百元，一定中，一定有得嗌，你話幾過癮！一季之內，冇幾多場如此㗎！

講到一定中，早年入場時，就目睹兩位非常喜歡認叻的「大哥」，有特種秘技保證自己「一定中」，一定可以「威威」。

小弟試過排隊投注，碰著佢兩位在前面，行到埋櫃位，對職員講：「W全餐，一百蚊！」

買完返包廂，然後與老友一齊嗌馬，次次都頭筋暴現：「上上上，哈，又中喎！」