【曾智華專欄】齊來集氣鋤強扶弱

馬場，雖云英雄地，但馬迷總也有人類天性——鋤強扶弱，尤其是見到當事人不斷努力奮發，只差三兩步就到終點，冇理由唔集氣支持。

你當然知我講邊個，對！正是兩位練馬師鄭俊偉及徐雨石。

另一位呢，丁冠豪太弱雞了，今季可以放棄，打定輸數先收警告信，下季再努力過啦。

其實鄭俊偉及徐雨石已分別六十二及六十三歲，就算續到牌，也只是玩多兩三季。不過，兩位皆在2005年獲發牌，做咗接近二十年，希望好頭好尾，捱到六十五歲正式退休就最好啦！

其實佢倆皆有過風光的日子。鄭俊偉最巴閉為2014年攻下聖雅尼塔短途錦標賽，國際一級，締造了香港首匹馬勝出美國大賽的歷史，風光一時，非常之威威。

徐雨石也不弱，曾在2007年馬季贏五十一場，列練馬師龍虎榜第三位，也曾在2018年遠征首爾，競逐韓國一級賽得亞軍。

兩位捱下捱下，就快到事業終點時才陷低潮，看台都替佢哋肉緊，加上差三幾場夠數在望，次次賽事即使唔買佢哋出賽馬，都替佢哋打氣，上上上！

尤其鄭俊偉，非常黑仔，大量馬入亞季軍，即次次去盡場場搏。

好嘞，明天乃今季最後一次高潮，跑國際一級賽，大長途二千四百米，平磅。

上次小弟搞錯咗，以為5月5日三級賽也是平磅，貼咗「將王」，點知布文擺明遊馬河，根本全冇用力，肯定真正箭頭就在今場！八匹出賽馬中，「將王」又老又並非最高分，咁應該燒都唔會成大熱啩？

好，今次一於瞓落佢身上，以「將王」做二重彩複式膽，全餐，一百四十蚊買。睇韋達操練部署，肯定會在呢場執會，盡地一煲㗎喇。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。