《我在這裡等你》好彩有劉俊謙丨頭條戲場

一套《九龍城寨之圍城》令到中港台多咗好多劉俊謙老婆，有劉太關注組我會秒速加入。《我在這裡等你》因為有佢所以狗衝入場，結論係范少勳好靚，劉俊謙更靚，台灣風景激靚，有大海有煙花有張國榮嘅歌，睇劇照同預告都暗示兩位男角有大量曖昧感情，以為劇種是俊男BL，滿心歡喜可以瘋狂FF，人生果然有好多遺憾，抱住睇靚仔攬錫的腐女們應該會好失望。(已上映)撰文:廖思慧    

已經唔記得呢幕講乜，但因為劇照好睇所以用嚟做大相。

 

全片冇明言兩人性取向，但以行動話畀觀眾知，

 

電影前半段有好多呢類曖昧場口，拍得靚嘅，睇到好興奮。

 

電影當然亦有優點，就係畫面好有美感，不經意偷望對方的眼神最好睇。

 

劉俊謙飾演失意的香港作家天宇，因為作品涉抄襲被狠批而飛去台北避靜，繼而在夜場被灌酒，幸獲當地古惑仔阿翔(范少勳飾)執返屋企。因為台仔講嘢冇句真，又吓吓講錢，港仔一臉厭惡，但因為台仔可以帶路去傳言可直達天堂的鯨逝灣，唔熟路加上被偷銀包的港仔萬般不願只能死跟。兩人沿途經歷大量枝節，由單方面討厭到互相慰藉，最後發現兩人原來有段跨越10年的奇幻緣份。

純睇靚仔可入場
觀影感覺好特別，片中有大量台灣好山好水畫面，雖然冇特別交待兩位男角的性向，但有壁咚，又有非常多的不經意互望，加上有唔少晒Body場口， 又浸水又沖涼，期待靚景下兩人會更進一步，但睇到尾先發現所有曖昧都點到即止，你一直以為睇緊一套青春BL電影，近尾聲先恍然大悟，原來是一套玩平行時空的奇幻電影。

阿翔好活潑又乜都夠膽講，天宇逐漸被融化。

 

旅程中兩人路經有瀑布的湖泊，當然唔好浪費，至於隻狗就充滿功能性。

 

不過好可惜，編導講故事能力麻麻，剪接亦好混亂，全片重點的時空穿梭睇到懷疑人生，兩男相遇力度亦好薄弱，全靠兩位男角撐起成套戲，特別是劉俊謙，由被屈有冤無路訴，到逐漸釋放自己至勇敢回港，全靠佢不斷將觀眾拉返入局，認真辛苦晒。

真實嘅人生冇可能reset再嚟，好好珍惜重要嘅人。

 

阿翔的哎吔阿妹夏夏（詹子萱飾)負責滿足男觀眾。

 

社工陳俞心（林予晞飾)認識童年阿翔，知佢跟天宇的秘密關係。

 

超靚劇照:

 

 

 

 

 

 

 

 

 

 

 

 

 

 

《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

緊貼最新最快新聞資訊，請立即下載星島頭條App：https://bit.ly/3Q29Vow

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。