【曾智華專欄】趁你病當然⋯⋯

商場講乜?當然講金!凡曰利的地方,就是利字先行,此乃推諸四海皆準的定律。

奇在仍有人睇到地產版新聞:許家印布力徑銀主盤四億七千萬元沽售。覺得太「離譜」。

點解「離譜」?因做價低過一年前估值八億八接近一半!

最傷的並非許家印,反正早已一Q清袋,在「裏面」長歎,怕且都幾難再出嚟。咁邊個最傷?正是同樣擁有布力徑十號班大富豪,突然自己間樓價錢插水,當然MM聲。

今次新買家雖然執到平貨,但其實佢出價未算最狠,因據報有興趣掃貨的共有幾十組人,包括內地大款、本地富豪(當然超級),以及傳統大家族,紛紛出價,睇嚟即全部低過四億七!人哋賣開八億幾,個個博懵,想以一半到三分一價錢執雞,銀主當然唔肯過你,故才拉鋸成年。不過,也難怪,商場就是如此運作——趁你病,當然攞你命!

許家印的布力徑大宅,初初向新世界發展一手買入時,正值黃金升市期,一買即升,去到五億幾的日子,老許曾豪氣對左右手講:「邊個賣樓賣夠數,我就送你一間值五億幾嘅布力徑豪宅,大家搏啦!」

呢個故事並非街邊阿叔或茶記阿嬸亂噏亂傳,而是一位商界非常有地位者向我講的。

當然,講完佢都笑笑口,做個——條友都癲癲哋的表情。

「癲」,正是不少內地巨富在過去二十年坐「白金升降機」之因,班大款出手之狠、之離經叛道,香港的傳統富豪只可睇到眼凸而唔敢跟。

所以,唯有私底下互相偷笑:「內地班儍佬咁狼,在香港亂炒地,未見過大蛇屙尿,毫無戒備之心。睇下幾時仆直,到時等我哋執貨啦!」

講時似酸葡萄,結果中到開巷!

---------------------------------------------

>>>立即瀏覽【移民百答】欄目:新移民抵埗攻略,老華僑也未必知道的事,移民、工作、居住、食玩買、交通、報稅、銀行、福利、生育、教育。

>>>即讀【新移民專欄】:新移民第一身經驗,與你分享當下年輕移民生活日常大小事,即讀「新移民專欄」。

>>>下載【星島新聞(加拿大版) 】App,隨時看到最新最快新聞:
iPhone:https://apple.co/2IBi812
Android:https://bit.ly/2Pe8anu

>>>訂閱【加拿大星島網電郵快訊】,每天可收到最快新聞資訊電郵:
https://www.singtao.ca/subscribe/singtao.php

>>>立即關注加拿大星島新聞網TG Channel,讓加國新聞無遺漏全天候向你推送:
https://t.me/singtaoca

>>>訂閱CCUE YouTube 頻道,查看更多吃喝玩樂、生活資訊影片。
點擊以下6大平台 接收加拿大新聞及生活資訊
share to wechat

延伸閱讀

延伸閱讀

【黎太食譜】14層甜絲絲紅豆蓉幸福滿瀉 抹茶紅豆千層蛋糕

【曾智華專欄】極厲害的「抽血員」

【黃庭桄專欄】三季河馬

【康子專欄】與「恐襲」擦身而過

都市網新聞