【曾智華專欄】趁你病當然⋯⋯

商場講乜？當然講金！凡曰利的地方，就是利字先行，此乃推諸四海皆準的定律。

奇在仍有人睇到地產版新聞：許家印布力徑銀主盤四億七千萬元沽售。覺得太「離譜」。

點解「離譜」？因做價低過一年前估值八億八接近一半！

最傷的並非許家印，反正早已一Q清袋，在「裏面」長歎，怕且都幾難再出嚟。咁邊個最傷？正是同樣擁有布力徑十號班大富豪，突然自己間樓價錢插水，當然MM聲。

今次新買家雖然執到平貨，但其實佢出價未算最狠，因據報有興趣掃貨的共有幾十組人，包括內地大款、本地富豪（當然超級），以及傳統大家族，紛紛出價，睇嚟即全部低過四億七！人哋賣開八億幾，個個博懵，想以一半到三分一價錢執雞，銀主當然唔肯過你，故才拉鋸成年。不過，也難怪，商場就是如此運作——趁你病，當然攞你命！

許家印的布力徑大宅，初初向新世界發展一手買入時，正值黃金升市期，一買即升，去到五億幾的日子，老許曾豪氣對左右手講：「邊個賣樓賣夠數，我就送你一間值五億幾嘅布力徑豪宅，大家搏啦！」

呢個故事並非街邊阿叔或茶記阿嬸亂噏亂傳，而是一位商界非常有地位者向我講的。

當然，講完佢都笑笑口，做個——條友都癲癲哋的表情。

「癲」，正是不少內地巨富在過去二十年坐「白金升降機」之因，班大款出手之狠、之離經叛道，香港的傳統富豪只可睇到眼凸而唔敢跟。

所以，唯有私底下互相偷笑：「內地班儍佬咁狼，在香港亂炒地，未見過大蛇屙尿，毫無戒備之心。睇下幾時仆直，到時等我哋執貨啦！」

講時似酸葡萄，結果中到開巷！