【曾智華專欄】是簡炳墀的威力？

今次真真是：你問我，我問邊個？

係乜？正是昨天早上，一個月一次理髮，理髮師W為極資深馬迷，投注二十多年，對一切皆專注研究。每次皆會邊理髮，邊與小弟談馬事，所作分析相當精準。昨日佢突然拋出一條問題：「碌
Sir，你有冇發覺，『牙擦簡』（簡炳墀，五屆冠軍練馬師）前年年初離世後，佢幾個徒弟，包括葉楚航、徐雨石及丁冠豪，全部大跌Watt，尤其今季，簡直慘不忍睹，究竟點解呢？葉楚航升正練馬師時，曾威到贏冠軍練馬師，今季若冇『大至尊』，一樣沉底。究竟佢三個表現，有幾多與牙擦簡在世時，畀幕後指點有關？」

年輕馬迷可能唔知，簡炳墀絕對是馬圈傳奇人物，看似「一腳牛屎新界佬」，連廣東話都唔正，但練馬表現打倒不少過江龍，故能屢奪冠軍榮譽，乜大賽都贏過。咁威，故此口沒遮攔都冇人吹得佢脹，包括馬會高層。

好嘞，若各方高人知點答W，通知我啦。

今晚跑快活谷，有一場必定好睇，正是第九場第二班跑千二米。

牌面告東尼兩隻最勁，「顏色大皇」今季大熟大勇，專攻千二米，得三W兩Q兩P，只一場冇獎金，四歲好體力，必須尊重。

另一匹為「八駿巨昇」，上次失驚無神贏四個幾馬位，拋離勝出，被重手加十一分，可知在評磅員心目中分量，冇理由今次由龍變蟲啩？

最古靈精怪為「好友心得」，明明快活谷千二米主場，今季四W兩Q，上場突然走去跑沙田，幾乎包尾而回，難道今場會變龍？

呢場我會𥄫住容廄的「晶晶日上」，今季只跑五場，冇W但全入前四，上次配潘頓一點七倍輸死人，若論回馬槍，就係佢嘞，一於做膽，拖三隻又如何？

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。