【曾智華專欄】年紀大，咪谷壞

打開報章娛樂版，一睇，不期然自言自語：「咦！又返咗嚟？嘩，八十三歲仍咁Fit，真真天生麗質難自棄（我純粹亂噏）噃。」

講邊個？正是長年移居加拿大，與太太陳麗斯過著優哉游哉退休生活的「型佬伯」何守信。

睇落，真㗎，李察基爾（仍記得這位電暈無數女性的「美國舞男」嗎？）及阿倫狄龍都唔係佢嗰皮。前者七十四歲已開始少少變形走樣，後者大何B只五歲，但已殘到要求安樂死。反觀何守信仍一貫談笑風生，頭髮濃密（羨慕死不少男性），風趣幽默。

小弟曾於1978年在《歡樂今宵》與佢共事，見證此君對女性，真可稱魅力沒法擋，故此，出現一段又一段情緣，其實都幾「正路」。

現今娛樂圈中，有兩位「模範保養人辦」，一為九十二歲的胡楓，另一正是八十三歲的何守信，兩位長者身材Keep得咁鬼之Fit，其中一個共同點為——日日行。

某次慈善活動完畢，我本準備好專車送修哥回家，但佢答：「阿碌，唔使。我喜歡行，行得的話，一定唔坐車。其實在家睇電視，我也會原地踏步㗎，日日不停行，就會身體好。」

證諸何B，佢也認同：「每日行，要堅持，不是跑（以免身重壓傷膝頭），是行，可快行，可慢行，隨意就得，勿逼自己，以免谷壞，每日出點汗就收。」

小弟也如此，每日步行及拉筋四十五分鐘，發覺有助減慢肌肉流失及增加平衡力。

昨朝出門口，在電梯中遇見L太揸住枴杖步入。「早晨，發生咗乜事呀你？坐骨神經痛又復發？」

「唉……碌Sir，前排報紙先見到娛樂圈名人向太在家跌倒，要用步行器，我也如是。以為在家最安全，就此減低防範，畀枱腳一勾就仆倒，屁股大力落地，唉⋯⋯好彩冇斷手咋。」

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。