【曾智華專欄】今晚歎杯「紫雲冰」

馬季踏入尾聲，度馬時必須留意邊類馬已拼搏過度，出賽太多，可以先飛。

馬就只能有一定的拼搏「 里程」，出賽不能太過量，必須有回氣位，才可玩長啲。

所以，小弟早前指出，馬王「浪漫勇士」今季應該唞暑了。上月的女皇盃短頭勝出，真的是出了奶力，六歲馬，今季搏咗五場一級賽，有四場僅勝，次次出真力與亞軍纏鬥，若想玩多季，真的要錫住。

豈料幕後決定6月2日到日本出戰安田紀念賽，呢場再硬闖，相當不智，隱隱覺得將會輸，希望不會成為事實。

今晚又跑快活谷，小弟決定研究第九場三班千二米，大部分馬曾5月1日出賽，但當晚下大雨，跑少少黏地，賽績不能完全作準。

首先飛起「其藝先鋒」、「紅旺」、「穿甲鷹」、「快搏」及「樂加福」。剩下七隻，嚴格講全有機會入P。

一、「添開心」，今季三W一Q一P，交足貨，跑足九場，已交代，最多P。

二、「合夥奔馳」，呂健威爭冠棋子，連𡁻三場W，全部Easy Win，未見底，膽硬。

三、「有財有勢」，今季跑咗十一場，典型蔡神仙跑死罷就一類馬，出嚟博P。

四、「太陽拍檔」，今季一W一Q，今場最多只會P。

五、「多利神駒」，轉倉後已連W兩場，五十二分升到六十三分，競賽生涯跑咗二十四次，應夠皮，又係最盡P。

六、「加州德至」，巫偉傑為省招牌，博得一定去盡，千二米要預埋佢。

七、 「紫雲冰」，若果要爆，就係方仔呢匹，正牌千二米專家，上季出十一場，三W兩Q四P，今季跑咗四次，上場泥地擺明「隔沙」，今次可以起義。

總結，「合夥奔馳」、「紫雲冰」雙膽，拖乜你自度！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。