【曾智華專欄】母親節萬歲

每年有一個周日必定冇馬跑，正是母親節，應該嘅，應該嘅。父親節呢，則睬你都儍，馬照跑。

單單呢個安排，已見馬會的「男女不平等」，但這個不平等，絕對冇父親會唔高興（因為父親愛跑馬）。

講返明日，乃酒樓食肆全年最好生意一日，就算平時唔夠孝順的仔女，點都要呢日扮吓嘢，喂，如果母親節都走咗去躝街唔理阿媽，仲係人嚟嘅？

飲食業老友話，其實今晚都會爆到飛起，因每個家庭都要與母親大人晚飯，可能最少奶奶與外母分兩餐也。

馬會為咗配合母親節，無謂搶光芒（係啩？），故此，今日沙田的戲碼認真麻麻，打開個排位表已毫無興奮感。不過，馬迷就是馬迷，渣的賽事都會堅持捐輸多少，有得玩好過冇得玩。

今日我專攻研究三班一千米。呢場可以飛起的馬甚多，初出的「愛意龍」、「智勇名駒」及「整蠱專家」，首先打個大交叉。頭兩駒初出兼在海外從未跑過直路，後駒呢，資深馬迷皆知，馬名經常反映賽績，大佬，你叫「整蠱專家」，怕且無人會想畀你「整蠱」啩？

但另一匹初出的「會長之寶」則需𥄫實，因海外四出直路，兩W一Q一P，全部上名，擺明路有專長，問題是幾時露出真面目矣。

其他可以飛的為「萬眾開心」（唔啱沙田） 、「英勇快車」（海外及本地皆未跑過直路）、「嘉應獎昇」（今季全跑千二至千四米，突然縮程，唔啱波路）。

剩下三匹，「水晶酒杯」必成大熱，呂健威要爭冠軍，去硬！「怡心聲」入位機會甚大，此程專家，只嫌略老。有機會爆的是「萬里飛至」，長期伏匿匿，等時機見真身！

一於二重彩複式，膽用「水晶酒杯」拖「萬里至飛」、「會長之寶」及「怡心聲」三隻！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。