【母親節特輯】不一樣，又一樣的寵愛（一）：突然闖進生命的女兒 拼命無恙 陪貓星人玩到盡

【母親節特輯】新一代家庭把寵物當成小孩一樣寵愛，飲食、醫療、娛樂等每一環均安排周全，絕不馬虎。母親節將至，記者為大家找來兩位溫哥華寵物家長，分享與「孩子」的動人點滴，兌現一生一世的承諾。

「不是牠陪我，是我陪牠。Peanut 能夠繼續呼吸已經係奇蹟，唔知仲可以陪幾耐，希望牠之後的日子也能開開心心，食得瞓得走得，我地就心滿意足了。」

貓奴Lala 和Billy 原本已有兩隻貓貓阿叱和飛鴻，一年多前機緣巧合下，受朋友所託暫時照顧當時10歲左右的貓貓Peanut，「牠原本主人老伯伯離世，女兒無法照顧，打算送往SPCA，朋友發現後想試下養，但她即將要去歐洲旅行，就問我們可否暫時照顧。」

未料，照顧了Peanut 幾天後，發現牠食好多食物但瘦得離譜，僅夠5 磅。原來牠患有嚴重的甲亢(Hyperthyroidism)，但完全沒有接受過藥物和任何治療，「某個星期日早上發現牠去唔到廁所，又不停屙一粒粒類似血啫喱的物體，嚇死人，即刻急急腳送去睇急症！」急症室獸醫表示Peanut 的甲亢進入「完全失控」的狀態，相比正常貓貓18-40 的水平，牠的血液T4 指數高逾200 多。

甲亢失控 生命危在旦夕

獸醫開了一些止痛和控制甲亢的藥，再由家庭獸醫跟進，之後Peanut 的病情反反覆覆，不單控制不到甲亢，白血球指數也離奇地低。「試過幾次Peanut完全不吃不喝幾日，奄奄一息，最瘦跌到只有4磅多，真係好恐怖，家庭獸醫也搲爆頭找不出病因。」

朋友旅行後回來，發現Peanut 有病，自己又無照顧貓貓的經驗，打算把貓交回原主人的女兒送往SPCA。兜兜轉轉選擇權又回到Lala 和Billy 手上，「當時完全無諗過要第三隻貓，但跟Peanut 已相處了一段時間，無法想像要把牠送往SPCA，更無法想像牠之後的遭遇。」

最終二人決定跟貓貓齊上齊落，「其實Peanut 好叻，而且夠貪玩夠為食，唔似得其他貓有病收收埋埋，一唔舒服就會表現出來，唔肯食野唔願郁，同平時表現得好唔同，我地就識即刻帶牠看醫生。」「我們懷疑Peanut 白血球指數太低係對甲亢藥物敏感，但當時醫生認為可能性不太高，所以又拖左一排，最後証實真係藥物敏感，感覺真係好無助，唔知點樣先幫到隻貓控制甲亢，其他器官都因為負荷太重而開始衰竭。」

天無絕人之路，Lala 和Billy 上網查看其他貓病歷，發現原來藥物並非唯一出路，溫哥華有一間專治貓甲亢的醫療中心，用放射性治療能永久根治疾病。

「本身的家庭獸醫話未聽過放射性治療，要研究下先，但我地追問過幾次，都係無結果。現在回想，當時診所真係太過『家庭式』作業，無接觸過甲亢比較嚴重的貓狗。所以我地另外找了一間比較專業和有規模的獸醫診所，經轉介就可以開始排期做治療。」

幸運遇上「神醫」接受適當治療

好像跟時間競賽，一邊等排期，一邊要小心處理Peanut「無藥物控制」的甲亢和其他器官反應。等了接近一個月，終於到了接受治療當天，二人滿心歡喜帶Peanut 見醫生，卻傳來噩耗，「我地見佢個肚近期圓碌碌，心諗今次增磅實掂，點知醫生發現Peanut 原來滿肚肺水，要即時做手街抽水，亦怕負荷太大不適宜做治療。當時好似天跌左落黎，無曬希望。」

二人驚惶失措，要主診醫生安撫情緒，指先抽肺水再作打算。「當值主診醫生Dr. Karen 真係好似神醫咁，成功抽水後衡量了Peanut 情況，跟我們講清楚所有風險，竟然力排眾議，願意為Peanut進行治療。」據說，Peanut 是打破該診所紀錄，不但是T4 指數破紀錄最高的貓星人，更是因首次治療結果T4 指數仍然高企，成「雙料冠軍」，兩個月後要再度「入廠維修」接受第二次放射治療。「真係好好彩遇到Dr. Karen 肯幫Peanut，畢竟冇人知會發生咩事，有可能影響診所成功個案的紀錄，如果無醫生肯幫牠做治療，當時同等死無分別。」

接受放射治療後，Peanut 甲亢情況得以控制，但心臟和腎臟已因為早期處理不當和負荷過重而永久受損。除家庭獸醫外，還須轉介至心臟和物理專科跟進個案，每天須定時服兩次藥，令二人日常生活大受影響。Lala 坦言明白Peanut 的情況，「無辦法㗎啦，器官受損加上長期服藥，永遠無法逆轉做隻100% 健康的貓。但做得幾多得幾多，相處久了，便能找到跟牠的相處之道，好好伺候Peanut 娘娘。」

努力過生活 拼命去生存

「可能Peanut 以前係outdoor cat，特別鍾意出街和遊車河看風景，所以我地成日帶牠出公園散步，仲試過去Kelowna 和Galiano Island Road trip旅行、去Chilliwack Camping，搭車又搭船，甚至荒山野嶺都難牠不到。」而且，Peanut 特別「為食」，最喜歡吃芝士，每次嗅到食物的香味，都第一時間跳上飯枱覓食。可能是前主人的關係，牠又特別喜歡聽英文電台和新聞報道，「相信Peanut 都好掛住以前主人，雖然前主人未能發現和好好處理牠的甲亢問題，但佢地一定有很快樂的日子和回憶。

Peanut 是一隻十分黏人的貓，每次外出都『滿場飛』，睇醫生也不例外，姑娘和醫生全部都淨係識同Peanut Say Hi 講拜拜。去旅行住酒店更加全程開水煲嚕嚕叫，喺Kelowna 第一次手拖手一齊瞓覺，同喺屋企個悶樣完全判若兩貓。而且礙於本身已經有兩隻貓，年紀和性格問題完全夾唔到。唯有多啲帶佢出街，但順得哥情失嫂意，每次帶Peanut出街就像『偷情』一樣，得罪家中另外兩位小王子。」

「個個朋友聽到Peanut 的故事，都話佢好彩遇到我地，但其實係我地好多謝Peanut，用生命教識左我地好多醫學知識，努力過生活拼命去生存。只要一日Peanut 不放棄，我們也不會放棄。」她們呼籲所有寵主也要好好裝備自己，細心留意毛孩子的日常細節，有問題及早求醫不要耽誤病情，笑言：「同埋記得買寵物保險！」

文：Kannis Cheuk 
圖片：由受訪者提供

V09

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。