ZolarWind狂做歌期待出黑膠碟開騷 社會氣氛低沉靠好回憶撐住前行丨獨家

樂隊ZolarWind推出新歌《回憶修煉場》，希望在社會氣氛低沉時，提醒大家可靠美好回憶向前行，而MV亦充滿香港舊情懷，他們更挑戰社團大佬角色，成員藝琛更獲讚演技有吳鎮宇的級數。另外，他們認為安然走過後疫情時代要更積極做歌，今年至少出5首，為推出實體碟及開騷鋪路。 採訪：杜杜

訪問當天Tommy Chan有工作，只得（左起）波子、藝深和阿冠現身。

ZolarWind四子，包括：鍵琴手藝深（左）、主音阿冠（後左）、結他手Tommy Chan（前）及鼓手波子（右）。

藝深認為疫情過後，社會氣氛極差，好多人患上情緒病，「用咩心態去面對逆境呢？有人選擇逃避，有人否定一啲唔開心記憶，其實開唔開心，都係人生一部份，用健康心態去面對過去好重要。」他亦是靠正向思維走過疫情，更套用偶像王家衛的電影《東邪西毒》的經典台詞，「『當你不可以再擁有的事，你唯一可做就是讓自己不要忘記』，人生有好多嘢好無奈，唯有好好保存美好回憶。」

藝深靠正向思維走過疫情。

阿冠比較放得開，遇到不如意，唔會太影響情緒。

波子全靠美好回憶支撐，令心情變好。

藝深演社團大佬有氣場

阿冠承認自己比較放得開，遇到不如意，唔會太影響情緒，「疫情前後心態都差唔多，人最痛苦都係執着，每個人都有負面情緒，唔會畀自己不停鑽牛角尖，唔開心一陣，做嘢就會唔記得。」波子就全靠美好回憶支撐，令心情變好，「珍惜現在擁有嘅嘢，好似我睇見阿媽湊孫，回憶返阿媽後生帶住細個嘅我，記住一啲好嘅嘢。」講到MV充滿港式舊情懷，他們更興奮首次挑戰社團大佬角色，阿冠還大讚藝深演技，「藝深好有氣場，係《無間道II》吳鎮宇嘅級數，佢係畀音樂耽誤嘅演員，哈哈！」

藝深被隊友大讚演技出色，拍得住吳鎮宇。

MV 中，藝深和阿冠飾演黑社會大佬。

雖然市道差，但無損ZolarWind做歌步伐，藝深說：「今年想做到5至10首歌，所以要加速，但冇可能隻隻都拍MV！」他又好想推出實體碟，「等儲多幾首歌先，其實出CD已經變成純粹收藏品，所以最想出黑膠碟。」他們亦想盡快開騷見歌迷，藝深說：「真係最想做Show，今年搞嘅話驚累老闆，唔急嘅，做好啲歌先！」

ZolarWind謂《回憶修煉場》表面是情歌，實則講人生。

ZolarWind早前跟經理人黃柏高，一齊為阿冠慶生。

《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

《星島頭條》新網站有更多精彩內容：http://www.stheadline.com/