【黃庭桄專欄】賣慘謀生

小時候的你，一定聽過「狼來了」的故事。第一次講大話，別人相信。到第二次講大話，別人依然選擇相信。然而當去到第三次，輪到說真話時，誰也不會上當了。 　　

到底張致恆和太太雯雯，是否自幼都不愛看童話故事？所以根本不知道，自己就是飾演着「狼來了」的主角。 　　

不務正業、不思進取、游手好閒、吊兒郎當、好食懶飛、賒借度日……全部用來形容張致恆，也不為過吧！ 　　

馬死落地行，開不到飯嗎？吳浩康為了養家，可以到地盤做職安真漢子，贏盡大家的掌聲。他肯捱，用汗水去賺每一分錢，絕對值得敬佩。 　　

但張致恆呢？他肥屍大隻，何不步吳浩康後塵做地盤呢？是不是懶慣歎慣，不想日曬雨淋？抑或滿腦子斂財大計，鍾情在社交平台賣 慘，攤大手板乞求課金贊助生活費？ 　　

大人唔食，小朋友都要食，就是因為一份惻隱之心，相信不少人都會捐助少少錢，不忍心張致恆四名年幼兒子捱餓。可能見食髓知味，唔使打工就有錢收，張致恆兩公婆經常出帖文，一時話冇錢交租，一時又病呢樣病嗰樣，然後出埋課金連結，等「水魚」游埋來。 　　博人同情的橋段，頭一兩次可能會有用，但次次都話自己點慘，又唔見張致恆有畀心機返工，轉頭仲有錢請埋工人，咁即係點先？ 　　

這對本世紀最「苦命」的鴛鴦，最近又出屎橋（請別怪用字刻薄，因為真係信唔過），雯雯話自己入急症室，仲聲稱懷疑生腫瘤，然後又話三仔發高燒，細B又咳，跟住仲爆隻狗生癌，最後當然話自己冇收入、冇錢交租……下一次帖文，可能會是屋企隻曱甴餓死了，想眾籌殮葬費？