【曾智華專欄】信心保證Vs.行貨保證

一個人，一件商品，一間公司，一個城市，一個國家，「招牌」極重要，因這個「招牌」就代表你在別人心目中的卡士、質素、級數⋯⋯所以，識諗的人必定珍惜自己的「招牌」，不會胡亂出招，因「招牌」壞一次，不知何時才能翻身（像以色列濫殺巴人）。

電影導演當然如是，有的導演，一見佢個名已知必屬行貨，睇唔睇都冇所謂。香港影圈正有三兩個這類導演，奇在佢哋長拍長有，可能老闆眼中，屬「快靚正」又識慳啩？

不過，遺憾在大卡士演員，例如劉德華、古天樂、郭富城、任達華⋯⋯等影帝級，一落在行貨導演手中，立即光芒盡失，請你唔好問我係邊個，資深影迷冇可能唔知。

不過，同一班演員，若落在信心保證的導演手上，效果剛剛相反，立時光芒四射，紛紛可競逐金像獎。這類信心保證的代表者，正是剛剛奪得金像獎的導演鄭保瑞。

唔明我講乜？易！火速入場睇佢最新傑作《九龍城寨之圍城》啦。

任何有要求的觀眾，必不時期待鄭導演電影上畫，因次次睇完佢作品，都覺享受了一次極級聲色藝旅程，非常超值。

鄭保瑞應是香港影壇最多粉絲導演，故此，《九龍城寨》一上，首日入場觀眾已七萬多，創下香港影第二多（第一位是《寒戰2》）紀錄。

睇完後，結論是不單止導演及演員，其他幕後崗位，包括編劇、攝影、燈光、剪接、美指、服裝⋯⋯以至道具，皆交出一流一水平。

更令人眼前一亮，為日籍武術指導谷垣健治，此君的設計，與董瑋及錢嘉樂相比，又是另一種藝術，將唔多識打的古天樂、林峯、任賢齊全變大師級。而真正打得的伍允龍，更是勁到飛起！