專欄｜忠誠會有好報嗎？

馬高列奧斯係我小朋友時期愛上多蒙特其中一人，靚仔瀟灑，記得佢以前有一招好絕，進攻左邊禁區對外5碼射罰球，畸角位同角球旗之間，有啲人可能會話係卻奧斯世界盃嗰球，但我永遠記得係馬高列奧斯嘅位置，有一段時間佢每球都入，去到依一刻講波我都會講。

2屆德國盃，3屆德國超級盃完全唔可以代表佢嘅成就，多次錯失德甲冠軍，見證住咁多位兄弟離開，例如羅拔仔同馬里奧葛斯等等，有啲又會返嚟，好似查頓辛祖同曉姆斯，可能好多人會笑佢咁忠誠做乜，當年有曼聯唔去，但試諗下佢去到嘅結果會唔會同辛祖一樣？

佢對球會嘅愛係毋庸置疑，冇任何嘢可以去衡量，好快5月31日將會係佢35歲生日，近年球隊已經淡化佢嘅作用，再唔係跑得帶波推進嘅小伙子，已經蛻變成球隊支柱，精神領袖，帶領下一代。

多蒙特完成歐聯主場最後一役，近十二年只係甩過兩屆冇踢歐聯，難得主場領先巴黎聖日耳門，只要過多兩關，就可以將最後禮物送俾佢，證明忠誠最終都可以修成正果，我哋一齊拭目以待。Willhappy

-----

《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。