【曾智華專欄】夾期夾到人都癲

不同時期，有不同現象，都幾新鮮。
　　
小弟精力過剩，又喜歡敘舊，故此，會不停搞這樣那樣的飯局，有舊同事的，有舊同學的，有同業的，有同聲同氣的⋯⋯
　　
早年搞不難，出個通告，大家報名，好快掂，冇乜麻煩。
　　
但近兩年情況有「基礎性轉變」，即係點？即係現時的香港人有幾個現象：一、各散東西，移走幾十萬人，當中必有你的親戚、朋友、舊同事，只間中返來香港探親。
　　
二、疫情過後，加上港元強，留港的，一有機會，尤其是周末長假，必向外湧，一下子走百幾萬人閒閒哋。
　　
三、各行各業回復正常後，各式國際會議也回復正常，當打的多需要不時飛呢度嗰度開會。
　　
以上三項同時發生，會點？會極難安排一組人同時見面食餐飯。
　　
以前搞飯局易過借火，搵好食酒樓乃我強項，加上為食鬼眾多，人選定後，手機撳幾撳已可掂晒，到時到候大家出現，杯酒言歡。
　　
不過，新香港新情況，要約齊人變成極之困難，因各有各自的安排考慮，不似以前，大部分常留香港。
　　
最弊是出現「十個救火的少年」！意即本來個個承諾會出席，但當日子一日一日逼近時，這個那個會逐一用不同藉口退出，搞手立時頭暈死得，尤其若個個未交費，拍拍屁股算數，更杰！
　　
大人大姐，個個失場總有自己理由，但幾多個會設身處地，為搞手的處境作考慮？
　　
真的，我希望人人都曾做過搞手，組織過活動，便會理解當中的困境，如此，肯定更懂得尊重其他人的付出，而不會輕易「拍屁股」，只顧自己情況而做「十個救火的少年」。
　　
我會繼續搞活動，亦希望參加者有「泥水師傅做門」的態度。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。