【康子專欄】下午茶餐的「選擇困難」

如果可以的話，午膳盡量避免在中上環。
　　
人山人海，疑似暴動。即使是文華或任何會所，總是群情洶湧，全體服務員，一律神情焦躁，全身繃緊，明嘅。
　 　
不如等一陣 ， 兩點半後「 下 午茶」。節奏稍為放慢，但不等於可以Hea做，那是另一個江湖。
　　
跟吃早餐一樣，出現「選擇困難」：蒸魚、燒味、粥粉麵飯，還有四季蛇羹及臘腸飯，尚未計西式糕點，或日式洋食等等。點算？唯有盡快燃燒能量，令自己「享受飢餓的樂趣」。
　　
其他勿論，只是中環街市的周邊一圈（不是內部），已有多間燒味飯店，位位名家，個個高手，沒有省油的燈。約兩年前，筆者在社交媒體，即興做了個「燒鵝飯龍虎榜」，居然很受歡迎。但志不在寫食評，熱鬧過後就算。
　　
最近，在其中一間吃下午茶餐，來了一位時髦OL，點「乾炒牛河」，追問一句：「你們的牛河，係咪即炒㗎？」女當家豪氣干雲，拍枱道：「梗係！即叫即炒，即刻落鑊，你估我哋係尖沙咀，同油麻地嗰啲呀！」嘩，疑似挑動全港十八區仇恨。究竟佢哋有乜唔妥先？
　　
「根本一早炒定，擺喺度，個客叫到，至放入微波爐，『叮』一聲攞出來。」「係你就趁早，仲要人等十幾二十分鐘，仲『叮』得大大聲。一係你就收埋搞，細聲啲，咪畀人知道。」
　　
廚房大佬可能順風耳收到，落力配合：「咋」一聲起油鑊，跟住快炒幾下，一碟熱辣辣、香噴噴的牛河，即刻上枱。OL小姐十分滿意。可別說，出真功夫，有感染力，即使你剛吃完下午茶，聞到那陣熱香，恨不得也叫一碟。
　　
論效率，「尖沙咀/油麻地」那種做法，未嘗不可。但今時今日，咁嘅服務態度，經已不足夠，上環燒鵝店多做點工夫，於是得到應有的回報。
　　
所有人與事，都是一點一滴的累積，因果循環。香港人常說「北上消費」，看哪一區，還有看哪一處？大家都是不進則退。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。