馮盈盈狂讀書追求精神滿足：我變咗喇 告別拜金女 兩年內唔會拍拖丨獨家

馮盈盈自2016年當選港姐冠軍後已是「話題女王」，是非不絕，更被標籤為拜金女，前年有指衰推劇被掟入雪櫃，直至拍《逆天奇案2》解凍。盈盈冇浪費人生，趁冇工開重回港大修讀營銷學碩士，更重新搵到定位，變身人生導師。對於被指讀書洗底，刻意搣甩拜金形象？強調兩年內唔會拍拖的她巧妙回應：「我會拜呢方面嘅金，就係追求書中嘅黃金屋，𠵱家我着重精神滿足！」 　採訪：方騫平 攝影：譚志光

馮盈盈被雪後搵返定位，重新出發。

 

馮盈盈係聰明女。

 

盈盈未來兩年專心工作及學業。

 

就算有公子哥兒追求都唔會拍拖住。

 

盈盈懂得為自己打算。

 

在《逆天奇案2》中，馮盈盈不再是陳展鵬及林夏薇的「第3者」，跟打救她的暖男男友高鈞賢變甜蜜CP，上演公主抱、咀嘴、小鳥依人等冧爆場口，連女導演睇完playback都大讚兩人有火花。在盈盈眼中的高鈞賢似大哥哥一樣照顧身邊人，對於兩人結伴逛深圳超市被野生捕獲，女方更一臉冧冧豬對住男方，盈盈即笑說：「係咪讚我笑容甜美，觀眾感受到我哋好有CP感呀？」

上集《逆天》時飾演進擊嘅「第3者」。

 

在《逆天2》中喊戲連場。

 

喊得好悽涼。

 

演技大爆發。

 

拍前由泰臣教戲。

 

搵泰臣惡補演技
　　盈盈在劇中要演繹生死戀感覺，內心戲相當複雜，喊戲連場，情緒表達亦有唔同層次，雖然戲份不及上一集，但發揮好大：「為拍呢套劇，我請咗泰臣做戲劇老師，將所有場口預演一次，做定功課先去『考試』。」之前盈盈孭飛的《妳不是她》曾被狠批演技，問到是否雪藏過後變得更進取，懂得珍惜機會？她打官腔避談：「機會一直都珍惜，只係一直尋求方法做好啲，尤其唔再係新人，觀眾包容程度冇咁大，要拉高標準尺度，追上觀眾步伐……學海無涯，自知有好大進步空間，希望觀眾見證我能突飛猛進，感受到劇中人比第一集變得成熟及沉穩。」 

同高鈞賢係一對。

 

兩人演得投入。

 

劇中跟高鈞賢似經歷生死戀。

 

首做女一嘅《妳不是她》演技受批評。

 

《妳不是她》盈盈孭重飛。

 

𠵱家係真正自己
　　提到停演兩年，可有得着及啟發？盈盈幾乎被考起，諗咗一陣才答：「都感恩中間有段時間畀我沉澱，原來演戲要同角色有共鳴，如果劇接劇就未必感受到生活，永遠去唔到另一個level。」盈盈是2016年學霸港姐冠軍，當選後即受公司力捧，就算主持節目《後生仔傾下計》因言論大膽出位被封「性博士」，2018年也能極速上位奪得「女飛躍」獎，後來因跟江嘉敏去過富豪船P反晒面，被指係是非拜金女，形象急轉差。不過，解凍後嘅盈盈脫胎換骨，唔止戒嘈，更加添文青書卷味，似乎刻意修正負面形象。對此，她大笑道：「唔係刻意嘅，係自然地做返真正嘅自己，咁樣最舒服自在，以前為咗主持綜藝節目要全情投入氣氛，要開心活潑啲怕交唔到貨，𠵱家展露大家未見過嘅一面，其實識我嘅人會嫌我靜。」追問自我增值後，是否不再拜金？她答得巧妙：「我會拜呢方面嘅金，追求書中嘅黃金屋，𠵱家我着重精神滿足多啲！去學習唔同知識先係最無價嘅財富。我打算未來兩年，就算遇上適合對象都唔會考慮拍拖，因為要專心我嘅工作及學習，雖然已完成碩士學位，但啱啱又收到哈佛大學嘅商業管理網上課程，希望透過唔同嘅專業考試豐富唔同知識範疇，會拍片將學習過程分享畀大家。」

馮盈盈係2016年港姐冠軍，亞軍與季軍分別係劉穎鏇及陳雅思。

 

2018年極速上位奪得「女飛躍」獎。

 

馮盈盈跟戴祖儀、麥美恩、劉穎鏇、何依婷等主持《學是疫學非》。

 

跟標籤專埋富豪堆嘅江嘉敏high tea。

 

過優質生活。

 

透過緋聞男友鄭衍峰認識富二代。

 

以前盈盈做綜藝節目聲大大，好嘈。

 

過往會着三點式晒吓身材。

 

進取盈盈。

 

 

讀書先有安全感
　　盈盈不斷讀書但否認鋪路轉行，強調跟公司仲有一段時間嘅合約，只不過讀書可以平衡心理壓力，而且近年經歷亦令她有感而發：「可能人大咗，出嚟做咗幾年嘢，體會到唔係一分耕耘一分收穫，有啲嘢自己好難控制到，會有不安全感，讀書反而帶出安全感，因為有幾多努力自然得到有幾多分，呢個會畀到自己努力嘅目標。」她又補充指自己心態唔同咗，更糾正一啲錯誤觀念：「女人最大魅力唔係來自香水及外表，吸引力喺修為及內涵方面，所以𠵱家會追求精神滿足（唔再追求名牌包包？）係呀，哈！我變咗喇。入行8年都希望大家睇到我嘅成長，係會成熟嘅。」

盈盈重返校園嘅文青look。

 

重返港大校園。

 

變得有文青氣質。

 

明白內在美更重要。

 

利用拍戲空檔做功課。

 

取得A級成績。

 

盈盈係港大畢業生。

 

增值後學以致用。

 

轉型後嘅盈盈，不時拍教學片分享求學心得。

 

《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

緊貼最新最快新聞資訊，請立即下載星島頭條App：https://bit.ly/3Q29Vow

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。