【曾智華專欄】鯉魚門能翻身？

闖蕩飲食江湖幾十年，再加經營過餐館，小弟對這個行業的優點與缺點，可算略略掌握。
　　
飲食業一如所有行業，龍蛇混雜，有極高層次情操者，也有極之卑劣蠱惑者。
　　
例如早年的鯉魚門，「威名遠播」——見人就斬！當時豪客不絕，先而日本，後而內地，大腕大款不問價者多如星星（大都是花公數或不能見光的黑金），有人認為唔斬佢哋就天無眼。
　　
結果，斬吓斬吓，斬慣手勢，連本地客亦手起刀落，個個一頸血離開。
　　
就此，鯉魚門的「形象」，深入民心。經濟大旺時，仍勉強頂得住，不過，一到2019年打落，社會運動加疫情，立即謝晒，有一段時期，入夜後，非常驚人，靜到烏蠅飛過都聽到。
　　
食物貴，只是其一，另外，交通不便也是頭痛。大熱天時，由港鐵站行落要十五分鐘，去到酒家已全身濕透，食興減半。
　　
坐的士？勁貴。揸車又如何？又是有段時期，所有停車場飛擒大咬，小弟試過一圍人揸四架車入去，食足幾小時（吃得開懷也），結果，泊車費大出血，六百幾元，畀得起都MM聲啦。
　　
今日講起鯉魚門，因有相熟經理晶姐被挖入去幫手，友情關係，勉強都要應酬一次。
　　
咦，印象有啲啲改變喎。可能早「被洗盡鉛華」，方方面面都唔敢再斬客，包括停車場及食肆，結果期望越低，驚喜越大，嘗到久未試過的高質素龍蝦刺身及野生海魚。
　　
不禁歎句：「冇法，全香港最正斗的海鮮，仍多聚在鯉魚門。」
　　
試完一次，有信心嘞，一於下月初拉大隊為食尖咀友再殺去搵晶姐，若掂，就在此公布食過乜，水準如何，應該可以幫到少少手，令鯉魚門翻身。
　　
到底，此乃一個香港地標，救到就救啦。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。