【曾智華專欄】想食好嘢？搵Leo

Leo是誰？中文名鄭思志，乃去年在美麗華廣場新開泰國菜館Mue Mue的經理。
　　
香港飲食業，大家普遍聽到的是呻，真的是呻到樹葉都落。兼且不停奔走相告，最新又執咗邊間邊間，有乜老字號公布唔玩。
　　
係咪非常令人洩氣呢？係。
　　
不過，這又並非全部真像，起碼資深為食鬼一定知仍有N間名店，想訂位？唔該排三個月到半年啦。點解會咁，你知嗎？為乜一切發生在「執笠店」或「大喊十店」的問題，並冇發生在佢哋身上呢？「執笠店」主事人必須自己查找原因。
　　
講返美麗華廣場，有多家食肆，不少是歷史悠久老店。近幾年也見頂得好辛苦，熟客越來越少，新客也不多臨門，點搞？簡單，約滿就執吓一間，執吓又一間。
　　
其實你想唔執都唔得，因經營商場的集團收租外，還要分成，若你冇生意而搞到佢口糠糠，當然換馬，邊有情講？
　　
換吓換吓，去年就換出一間新派泰國菜館，名Mue Mue，強調——重新演繹泰菜經典。
　　
小弟為食，凡新店，負擔得起的，必定一試，呢間冇例外。
　　
年初第一次幫襯，感覺非常良好，因此店的設計新穎而舒適，設計師高手也，一半室內，一半室外（方便吸煙客？），全部食物上枱皆強調視覺，吸引相機眼睛先食，味道也不錯。
　　
當時心諗，呢類環境，傾公事合作最適合，即時取得靚仔經理卡片，大名Leo Cheng。
　　
上周剛剛要決定一個商務午餐地點，立即搵Leo訂位：「一切交晒畀你，四位，食乜你發辦。」就此享受咗一頓賓至如歸的美味泰國菜。如此氣氛中傾合作，當然握手作實，客人超級滿意。
　　
呢餐主角為泰胡椒手切牛頸脊炒糯米河，小弟瞓低（即瞓身）推薦。