【曾智華專欄】由上而下慳錢KPI

任何現任或退休資深公務員，個個心知政府幾乎所有部門，要找出可慳錢之處，多不勝數（唔識我可教你）！不過，若要佢哋公開講，肯定人人彈開，耍手擰頭。反之，你問在位負責人夠唔夠錢用，則死都話唔夠，唔夠人，唔夠錢要求中央多撥資源開多位。此乃舉世官場必然自私現象，屁股決定思維。
　　
點解咁？各為其主，各有利益也。正常情況下，部門首長要爭取額外資源，極難。故此，凡已經到手的，必定死都唔放，就算你想放，你的下屬都會嘈到拆天。
　　
咁點搞呢？得！若要慳錢、要Cut嘢，由上而下可也。特首司長局長身先士卒Cut，如此，下面各個部門，豈敢唔應酬？
　　
如今政府大大聲呻窮，市民看在眼裏，會否同情？不會！幾時會？直至政府高層，包括行政會議所有成員，率先減福利、減人工，咁⋯⋯大家就會相信政府真的窮嘞。
　　
最有說服力，是現任政府首長級以上全部減薪，連前任的特首亦挺身而出，表示願與市民同甘共苦，將辦公室內無需要又豪華的花費，主動放棄或削減。
　　
最明顯為董建華及林鄭月娥，官場皆知，董先生的辦公室根本長期空置，是否可按實際情況「酌情處理」縮減支出？
　　
另外，林鄭月娥更令市民肉痛，究竟佢卸任之後，為香港做過乜（有冇㗎？），絕少人知，但納稅人替佢孭間甲級寫字樓開支，幾咁豪華、幾重錘就人盡皆知。老老實實，若庫房水浸，算啦，冇人會出聲，反正大把錢任浪費，但家陣乜時勢呀老友？點解我哋仍要年年花九百幾萬元畀「冇乜嘢做」嘅林太「辦公」呢？唔明。
　　
麻煩現任、前任特首自己先做個慳錢KPI（關鍵績效指標）。