【曾智華專欄】榮太子應再威威

做練馬師，若遇上一個似「榮太子」榮智健般的馬主，真真發達。單單服侍佢一個，已肥到著唔到襪，因太子大把錢，自然可以買最好的馬，多多都冇問題，最緊要贏！
　　
遠的唔講，四歲頂班馬「驕陽明駒」，雖然輸咗打吡，但出賽九場，六W一Q一P，三扒兩撥已贏咗二千三百萬元獎金，「蔡神仙」交足貨。
　　
另一匹又係深不可測，正是四歲法國馬「星際快車」，今年2月一出已知質素過人，跑兩場一千米，一Q一P，明日第三次上場，再跑一千米，就算熱到嘔都要用佢做膽，榮太子馬絕對唔「燉」，跑晒就換！翻查此馬海外賽紀錄，屬直路王一族，跑四次，三W一Q，最勁一場贏足八個馬位！
　　
明日三班一千米，「星際快車」乃當然擂台躉，一於用佢做二重彩複式膽。
　　
有隻大熱在，拖次熱當然冇肉食，故此，必須拖多幾隻。
　　
呢場首先飛起「燈胆皇」及「電訊驕陽」，新馬上陣，先觀察，往績未跑過直路。
　　
另一匹「超音速」，出賽兩場，輸多個馬位，擺明未得，有排操！
　　
舊馬方面，「旌鷹」腳法不合，非此程馬；「爵登」雖曾在此程W出一次，但其他四次冇影，顯示並不可靠，也可放棄。
　　
剩下的，「水晶酒杯」最有機會劏低「星際快車」，因五歲大熟大勇，也是一千米專家，兩季出賽六次此程兩W三Q，準到飛起，必須尊重！
　　
餘下三匹，最具冷味為「不可擋」，同是一千米專家，此程相當犀利，兩W四Q八P。今季看似走下坡，其實可能留以有待，根本未用，五歲馬，可再爆多次！
　　
其餘「萬里飛至」及「怡心聲」，也可入腳。
　　
呢場我會用「星際快車」做膽，二重彩複式拖「水晶酒杯」、「不可擋」、「萬里飛至」及「怡心聲」。後三隻，再互穿PQ！