【曾智華專欄】「咖喱方」師徒Q

今個馬季，令人欣喜的為見到不少華人騎師表現穩定或有進步，尤其明顯的是鍾易禮，已成為華人一哥，贏馬邁向四十場，排騎師榜第四位，認真唔簡單，相信主要受到師傅告東尼長期鞭策及過料，才有此成就，睇嚟鍾仔季尾應會在師傅手中，接過人生第一個頂級光榮——告東尼獎了。
　　
不過，第一步成功，並不代表已踏上通羅馬大路，因馬圈之內龍蛇混雜，少啲定力都極易失足，之前例子太多了。
　　
另一明顯進步的為黃智弘，不過，仍距離師傅功架一大截，幸已望見標竿。
　　
今晚賽事，小弟隱隱覺得方嘉柏會大搏殺，旗下「喜旺駒」、「大千氣象」、「賢心星」及「川河首駒」皆坐位望贏。
　　
但我最有興趣研究的，並非以上四匹，而是跑第五班長途二千二百米的「赤子雄心」。「咖喱方」乃快活谷黑夜之神，在此部署馬匹出擊之勁，無人出其右。
　　
「赤子雄心」已跑了三季，出賽總數三十八次，六歲，理論上都用得幾盡。但詳細研究，此馬在前季根本冇乜「去」，五十二分起步減分，減到三十分時才郁手。上季開始大熟，方仔一直玩加減分，竟可執一W四Q三P，而仍留五班，真真出神入化，問你服未？
　　
今季三十七分起步，一直減呀減，減到如今二十七分，就算早前三場跑二三四也冇乜加分，奇哉。今次重回贏馬途程，睇嚟應是盡地一煲格局，配合其他同廄馬出擊。
　　
呢場方仔徒弟蘇偉賢出兩隻，其中「綠登」4月3日出完，匆匆又嚟，上年底曾W出此途程，啱跑。估計，呢場師徒兩人早有布局，眉來眼去。今季「綠登」已交代咗，仲唔輪到「赤子雄心」？
　　
二重彩、Q及PQ去馬啦！