【曾智華專欄】唔係唔驚，唔係咁驚

今日標題是否有點「玄」？你一定會問：「碌Sir，咁究竟你驚唔驚呢？」
　　
講乜？大家應心照，就是近日人人不停猛講的「香港空城」，執笠處處，吉舖如麻。兼且個個話北上消費抵到爆，似已成大趨勢，個個搏命湧返深圳去。
　　
加上上周長假通街靜到飛起，若再咁落去，唔使人哋搞你，你自己都玩謝自己。
　　
小弟作為傳媒人，最喜歡分析城市脈搏，有幾多係理性的、有幾多係人云亦云的。另外，也思考各類社會現象產生的基本原因，無論正面、負面，是否暫時性的？
　　
先講復活節長假期，香港打工仔，尤其大機構及公職人員，真真唔走就奇。
　
第一：告三日假變十日；第二：港元咁強（多謝美國佬帶挈，加息加到美元猛升，但記住，咁搞法香港競爭力弱晒，唔內傷都幾難），相比之下，邊度都平，出外消費乃精明之舉。
　　
好嘞，既然「出走消費」乃智慧決定，當然雞飛狗走，結果一走就走百幾萬人，令成個香港靜晒，現象絕非反常。弊在你有長假，但內地同胞冇，點湧落嚟「交換遊客」呢？於是人與錢皆有出冇入，令香港損失慘重。
　　
你問我擔唔擔心？冇乜好擔心，你睇住，一到「五一」，上邊放長假而香港只得一日假期，到時你就會見到復活節時的相反現象，即廣東道會逼爆玻璃，因越來越多高質素遊客可來自由行。
　　
另外，香港是否真的出現執笠潮？Yes and No！就我所見及行內人告知，部分只是「假執笠」，幕後另有盤算也。
　　
簡單，土瓜灣有間翠河餐廳，3月31日「執笠」，幾日內已火速「裝修」好，4月7日內望見到大軍在部署重開，人物、裝修相同，只換咗叫「荷里活」，你明點解嗎？

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。