【曾智華專欄】被囚露底畸形心理

一樣米養百樣人，同樣，一百個人可能有一百種心態，全部別人難以理解。
　　
例如N年前我已發覺，不少人有「被囚狂」與「露底欲」。即係乜？即係無情情將自己困在一個大鐵籠內生活，又或將個人最私密的胸圍內褲（當然是女性），掛出露台最當眼處，向街上途人展示。
　　
以上兩種心態，似乎內地同胞尤為普遍，不少人近年移民到香港，仍沒改變習慣。
　　
幸而新落成的香港大廈公契，大部分有寫明「不准改變大廈外觀」，否則⋯⋯更巴閉的豪宅也可能鐵籠處處。
　　
不過，仍好難打擊「露底欲展覧會」。小弟家居附近，有個極豪華屋苑，六年前落成時，賣點正是標榜九龍市中心「豪宅中的豪宅」，要賣三萬元至六萬元一呎，理論上入住的，全部非富則貴。
　　
可惜個別業主錢就大把，但基本品味則好惡頂，不但在露台曬棉胎、床單，更甚也有個別「露底欲」一族進駐，故此，七彩內衣迎風飄揚，都幾污染城市景觀。
　　
上周到潮汕，一個早上，與導遊F去到當地龍北市場旁橫街，歎豬雜粿條，正在欣賞美味食物之際，抬頭一望，哎吔吔，真真倒胃口！因兩邊由二樓到頂樓（約六層），全部是「被囚狂」單位，個個窗花之外，更再裝鐵籠，難道呢
處盜匪如毛？未夠，最攞命個個單位鐵籠上皆掛滿各式大媽「底橫」及胸圍，更弊幾乎全部皆有日月痕跡，即洗到甩色變形走樣，望之相當惡心！
　　
呢一餐，嘴內美味，眼內受罪！
　　
據阿F講，呢類單位全部長者居住，根本冇小童會攀爬，不過，佢亦唔明，不少內地同胞，就算住在極高層大廈，凡公契不禁止的，也一律會起個鐵籠困住自己，怪雞！