【曾智華專欄】大闊佬作風

交友無疆界，當然包括商界。
　　
商界係乜地方？龍蛇混雜，爾虞我詐，敵友不分，散聚以利為基礎，兼且冇乜法治精神。總之，唔明顯（甚至明顯？）犯法就去馬，遊走在灰色地帶等閒事，你唔敢？一定冇大富豪重用你，唔該考政府工。
　　
與商界CEO（並非大老闆）或高層人灌兩杯，好鬼多嘢聽。原來個個大老闆作風皆不同，有啲用錢大大方方，有啲坐擁幾百億元仍両両計較，孤寒到爆（N年前某黃姓地產商為典型）。
　　
有啲，最忌下屬高調，功高蓋主的話，一律殺無赦。所以，識做的一律識「隱形功」，永不會曝光。
　　
不過，有啲大老闆則最喜歡低調隱形，最好你睇唔到我，你睇唔到我，平時屋邨阿叔款四圍去， 以生前的波叔為典型。
　　
講到唔怕下屬有型高調，當今世代有一位，楷仔。佢最著名，自己揸Audi，下屬坐「勞士」，一齊出發，唔識佢，分分鐘調錯身份。不過，喺香港，邊個唔識楷仔吖。
　　
另外有位內地落難巨巨巨富作風也令人O嘴。當然行賄銀行家及地方官億億聲，故此，要錢有錢（銀行多多都借），要地有地（官員多多都批）。
　　
來到香港與一眾大富豪建立關係，也當然豪到你唔信。
　　
其中最令人津津樂道的，佢咁犀利，除銀行家、地方官、大富豪（佢哋億億聲買高息債券），個個搞到掂過碌蔗外，更連嫡系馬仔也個個會替佢賣命。
　　
圈中故事，最誇張為佢曾指住山頂豪宅許下諾言：「X仔，若你賣屋賣舊Quota，呢間五億山頂大宅就你嘅，放膽去做啦。」
　　
攞你心兼攞你命，有邊個老闆可以咁豪？無他，佢曾坐擁幾萬億元，五億元係乜 ！