【曾智華專欄】民生高官慘慘豬

政治大形勢，《23條》順風順水通過，政府宣布由治入興，全力拼經濟，形勢是否好簡單？政策官員再冇後顧之憂，立法會將事事老奉通過？
　　
話你知，有啲必過，有啲必勾腳！
　　
前晚與幾位現任及退休高官討論官場大形勢，現任高官B，呻到樹葉落，苦過弟弟，灌完一杯又一杯。
　　
「喂B哥，乜事咁愁啊，人人都話如今立法會全部One Voice，非常齊心支持政府喎。」
　　
「碌Sir，外邊睇同政府之內的感受，差好遠㗎。嚴格講，比幾年前有反對派更差！」B哥搖頭苦笑，大口將杯中紅酒一啖灌光：「以前呢，反對派議員佔少數，基於佢哋乜都反，游說都嘥氣，而建制派又與佢哋勢不兩立，客觀上肯定夠票通過大部分法案，所以，只需與建制議員有默契即可，就算議會上捱反對派狂鬧，我哋可以當耳邊風，反正鬧又過，唔鬧又過，吹乒乓乎？所以，當年唔惡啃。」
　　
「咁如今有乜唔同？」我真的好奇。
　　
「如今？首先加到九十位議員，單單記名都暈低，不少更是新手，唔熟遊戲規則，但又心急搶曝光及博選票，所以可以好出位。」B哥分析大勢：「嗱，你哋睇到嘅，某啲必定要歸邊法案，當然個個唔敢有異議，咪嗱嗱聲過囉。不過⋯⋯唉⋯⋯」
　　
佢「唉」乜呢？原來班議員為爭表現，積極化身為民請命，政治議題唔郁，個個走去郁民生議題，一有虛位即死咬唔放，鋤到開花。於是有幾個局就孭都應，包括文化體育及旅遊、環境及生態、勞工及福利、運輸及物流⋯⋯上親去立法會，都預咗被議員當沙包砌來表演，不但大力「監察」，更分分鐘申請乜都被彈返轉頭，因可以見報，話畀公眾知——我在做嘢㗎！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。