【曾智華專欄】唔該你做馬主啦

幻想中，做馬主真是何其風光？你話嘞，養着隻「大至尊」、「金鎗六十」、「加州星球」、「浪漫勇士」、「美麗傳承」⋯⋯的話，何其威爆玻璃，名利滾滾而來？
　　
這個想法好正常，一如未做過生意者，凡準備自己或合股做生意，必定只諗Upside將會幾美好，幾時可以做到上市吸資。
　　
究竟有幾多個冇經驗的「天真馬主」或「天真商人」，會完成夢想？又有幾多個面對Downside情況出現時，懂得冷靜處理？百中無一！
　　
所以，小弟若被老友問到應否養馬時，必將養馬激氣/慘痛史一五一十分享，畀佢作心理準備，平衡下單邊幻想做馬主的興奮。
　　
不過，人一世物一世，有能力的話，做次馬主都幾過癮㗎。就算變冇癮收場，都起碼完成一個夢，試過！
　　
2024年馬匹進口許可證抽籤又快到，所有馬會會員，符合基本資格的，都可以入紙。
　　
首先第一關是顯示自己有財力，提供銀行文件，證明最少備有一百二十五萬港元資金。呢個「抽籤」，我用引號，因N年前開始從無透明度，唔似六合彩攪珠，公眾真係睇唔到點抽。所以，你會發覺有啲人年年入紙，年年抽唔到，另外則有一堆名人年年入紙，年年中，箇中「秘密」心照不宣。
　　
不過，今年「新人」抽中機會肯定大大提升。點解？大佬，今日經濟實況係點，你知我知。究竟有幾多人可以攞一千幾百萬元買隻馬，再月月用七、八、九萬元去養？
　　
我隱隱聽見有聲音：「唔該大家做馬主啦。」
　　
今晚繼續「跑悶馬」，全泥宴，但悶都照玩。二班千二米必精彩，因隻隻有往績，問題只在幕後「去唔去」。
　　
呢場黎、蔡各出兩隻而「晶晶日上」必大熱，一於用佢拖「四季醒」、「紫雲冰」及「魅力寶駒」！