【曾智華專欄】試的與真的

先講樣難忘歷史！
　　
話說1975年，小弟及一群貧窮學生赴笈夏威夷，個個來自窮到燶家庭，故此乜都慳慳慳，人人帶個飯煲，餐餐買超市過期菜，撈埋就食，真真口慷慷。
　　
想食好啲點搞？發現新大陸！全世界先進市場多樣文化，試食，香港至今仍不太流行，但其時所有夏威夷的超市乜都任試。
　　
就此，我哋呢班「人窮志短」的壞學生，就不停日日走去試食，又肉又腸又海鮮又甜品。終於⋯⋯真羞家，食到畀人針對性驅趕，死未？（呢啲唔係試，係貪心，而家都係。）
　　
此乃畢生難忘的「留學生日子」。
　　
講返今天。上周殺去潮汕狂食牛肉，飽飽後，離開前，例牌去最大的龍北市場掃貨。市場內逼爆，市場外也滿布各式專供遊客購手信店舖，最多的是賣各式肉丸。
　　
花多眼亂，競爭慘烈，點分？檔檔都畀你試，試完滿意才買。
　　
行呀行，有檔門面最大的名「品興」，巴巴閉，標明市級非物質文化遺產，掛滿獎狀。
　　
肥老闆大大聲嗌：「隨便試，試過至買！」
　　
我行埋去一睇，未定神，佢已指令女工：「煮兩粒丸丸畀老細試試！」
　　
女工遵命，好快從煲中取出一粒墨魚丸、一粒馬鮫魚丸。試試先，一入口，嘩！冇得頂，墨魚丸內有粒粒鮮墨魚，好味又有𡁻頭，馬鮫魚丸也鮮甜彈牙，真係從未試過如此高水準。
　　
講多無謂，立即大出血，手打牛丸、墨魚丸及馬鮫丸每樣三斤，共九斤，一於拉（用買餸車）返香港。
　　
回家剛剛晚飯，即灼啲丸諗住慰妻，等佢讚我識貨。點知⋯⋯一口咬落墨魚丸⋯⋯喂喂，點解冇粒粒鮮墨魚在內㗎？
　　
唔係唔好食，但同試的，兩碼子貨囉。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。