【曾智華專欄】潘頓硬鞭所向披靡

打吡跑完，但興奮之情繼續，因今季至此為止，呢場乃最精彩燦爛演出。尤其練馬師伍鵬志的部署，只差百分之一秒就Q都食埋，十個有九個都唔知亦唔敢信「嘉應傳承」可以咁放，由頭甩開到尾，令其他馬王追到氣咳。另外，短途馬「錶之銀河」竟可跳跑二千米而末段快到癲，令看台個個O晒嘴。
　　
當然，大家最津津樂道的，為「軟硬鞭」今次終於見真鞭。過去成年，小弟不停揶揄潘頓經常陣上遊馬河，條軟鞭拐吓拐吓，擺明末盡全力，但又次次得到競賽小組隻眼開、隻眼閉。
　　
呢呢，今次大眾終於知道丁友打真軍時，係點跑㗎嘞。佢功力之高，肯定列世界頂級，冇得唔服。
　　
不過，跑馬就是這樣，當「軟硬鞭」展示最硬的騎功後，跟住就隨時會再變側側膊，又攞返條軟鞭出嚟，吹脹你班馬迷。
　　
唔信？明天睇睇佢點跑，你就知嘞。
　　
本周末香港放長假，部分市民（當然包括馬迷）離港遠遊，加上高潮過後，自然編啲悶悶哋賽事頂住。
　　
十場之中，我專注研究一千米直路。
　　
呢類賽事，馬匹必須是專家，因條賽道怪怪哋，好講步速留放及擅長否。
　　
我先膽粗粗刪去九匹：「旋風飛颺」、「江南勇士」、「勝萬金」、「歡笑福星」、「至合拍」、「驍勇善戰」、「勝利之皇」、「輝煌精英」及「一代宗師」。另一匹韋廄的「紅逸舍」，剛由黎昭昇馬房轉入，之前跑到一塌糊塗，需重新做起，也不要。
　　
剩下四匹，各有優缺點而沒壓倒性，包括：「萬事快」、「龍東傳承」、「精彩勇士」及「令才」。四匹比較，「萬事快」上次慢閘，冇跑過，隨時變身！
　　
今場我會四隻複式二重彩（一百二十元），再用「萬事快」做膽，Q及PQ拖其餘三隻（六十元），博衝線大嗌！