【曾智華專欄】約「老友記」食飯要留意

同輩老朋友自知「食得一餐得一餐」，必須把握機會享受相聚時光，故此紛紛成立老同事、老同學、老兄弟⋯⋯老乜老物組，按時聚會，大吃（仲得唔得？）大喝（更少人得！），開心一下。
　　
呢類食飯組通常輪流做東，輪流決定食乜及邊度食，結果發現有點弊！
　　
弊乜？原來並非個個做東者皆思慮周詳，以致出問題。
　　
我輩七十歲或以上，通常健康現象，除三高糖尿眼矇耳聾外，最普遍為筋骨收縮及痛風、骨骹退化等症狀，故此，個別開始用枴杖，死頂唔用的，也可能舉步維艱，行一步痛一步。
　　
不過，並非人人如此，約三分一老友仍可健步如飛。呢呢，咁就出問題，因行動自如者做東道時，只會研究目標食肆好唔好食，完完全全冇諗對行動不便者可會有困難。
　　
舉例，港島區正正有三間著名的食肆，對膝蓋關節痛或行動乏力者，造成大問題。
　　
第一間陸羽茶室，地下訂到位仍可，但若需到二、三樓，就要捱一道又一道樓梯，其苦況絕非正常行動者能想像。
　　
另一間也在其附近，擺花街一號的碧儷苑，在斜路頂段，冇公共交通可到達。若由皇后大道中行上，腳部有事者就似受刑。更甚，又係要爬兩層樓梯，小弟提議負責人Ben哥：「你的菜式如此出色，一於搬啦。因現在格局，趕走好多長者客㗎。」
　　
事實，我很少在那裏請客，有點遺憾。
　　
另一間出現同樣問題的，為灣仔船街米芝蓮推介船記，叉燒好味到會飛，但又係要捱兩道樓梯才可抵達。
　　
前晚又杰，老友約在中文大學崇基學院教職員餐廳晚餐。落咗東鐵，仍要爬十多分鐘斜路及樓梯，真係食龍肉都冇味啦。