【曾智華專欄】幸運馬神會再來？

上周三晚賽事，本欄符符碌碌，貼士畀一隻中一隻，正是四班一千米的「顏色王子」，出閘狂放，一放絕塵，竟贏四個幾馬位，對手完全冇得跑。賠率更是超高，八倍幾，半冷。點解？無他，排十一檔，普通馬迷當然以為因外檔被頂死。
　　
其實跑一千米只要前速夠快，排外檔冇問題。因為一彈離即埋欄，再留力，絕對冇乜蝕底。我刨此馬，正是發覺佢可以有噴射前速，不過並非常用。
　　
以韋達咁老練，當然唔會吓吓畀你睇，故此只今季試咗兩場前速入P就收工，形勢有利就落搏殺令，即時大變身。
　　
今晚又有場三班一千米，不少老友以為小弟是「馬神」（神棍就會），紛紛來電問貼士。
　　
嗱，講明，真正的馬神專收叻仔，若我牙擦擦以為自己好掂，咁結果必被玩謝，冇咁儍，不過，就當玩玩吓分析啦。
　　
「美麗第一」今季在韋達訓練下，出五次三Q一P，但馬主郭太仍決意轉倉，會否太心急呀？呢場若是大熱，我一定唔行頭，因跑開千二米，縮一千米，可能先陣上試馬。
　　
「凌厲」勁，但又係長期千二米縮一千米，冇W相。
　　
方嘉柏「巴薩諾瓦」上季七十七分W一千米，今季可能會在此場變身，揭竿起義。
　　
告東尼的「浪茄仔」途程專家極穩定，要！
　　
韋達「天火同人」亦專攻一千米，今仗明刀明槍要做「美麗第一」攔路虎，以洩被拉倉之憤。
　　
羅廄「英雄豪邁」也是一千米專才，要預埋。
　　
黎廄「萬眾開心」今季收夠籌，應該先回氣。
　　
呢場全無重心，故此有機會的，都應包攬，為求好分，我決定飛起「美麗第一」及「凌厲」。
　　
一於用「巴薩諾瓦」、「浪茄仔」、「天火同人」及「英雄豪邁」四隻複式二重彩，再PQ， 一百八十元下注。希望幸運馬神又再降臨。