【曾智華專欄】殺上汕頭狂食牛

香港雖曰是個自由港，理論上全世界美食皆在此買到，如有問題，本應只得一個⋯⋯你有冇錢先？
　　
實質呢？絕非如此！
　　
舉例，大灣區的山水滑豆腐，香港有冇？冇！我問過N間食肆負責人，為乜唔運落嚟賣？內地客家煎釀滑豆腐，三十人仔左右，若香港有售，肯定值超過八十元！
　　
但冇就係冇，我要食，一如汕頭牛肉、普寧豆腐、手打彈牙鮮牛丸⋯…必須親到當地！
　　
上周又再殺上汕頭，其實有點煩，因要事先撲高鐵飛（如今天天一票難求），再訂酒店。到日子，來回五個幾鐘，周車勞頓。
　　
值得嗎？人人價值觀不同，對我來說，「抵捱」！留低三日兩夜，盡情食食食？
　　
早年到汕頭，食牛肉火鍋，有名又有水準的，來來去去三幾個連鎖集團。一般裝修又舊又殘，空調不足，衛生麻麻。雖然牛肉正、價錢平，但整體感覺就是大有改善空間。
　　
幸而隨著大量遊客湧入，市場高速膨脹，令投資者紛紛殺出。於是近年一間又一間由設計到裝修，再到服務及衛生高水準的牛肉火鍋，漸次出現。
　　
出發前託老友「汕頭S」介紹，佢鎖定一間新店名「潮庭」，賣點當然即日新鮮劏的牛肉。更重要安排一人一鍋，不用似舊式店般人人「隊」對筷子入同一個鍋，搞到「口水交融」。此外，更強調湯底用山泉水。
　　
入到去，嘩，東主果然有生意頭腦，竟拉得美國最大汽水品牌可樂聯手，大大個牌宣傳：「一口牛肉一口可樂，太幸福喇！」以及：「火鍋配可口可樂，美味歡聚更快樂！」
　　
宣傳有冇影響到小弟？冇！我當然紅酒配牛肉啦，小朋友咩，飲汽水！
　　
最重要，牛肉得唔得先？
　　
我從未試過在汕頭食牛肉有唔得的！